تۋريستىك كومپانيالار پاندەميادان كەيىن ءوز جۇمىسىن جىلدام رەتكە كەلتىرە الدى.
وتكەن جىلدىڭ ءۇش توقسانىنىڭ قورىتىندىسىنا سايكەس، وتاندىق تۋريستىك وپەراتورلار مەن اگەنتتىكتەردىڭ تابىسى 185،11 ملرد تەڭگەنى قۇرادى. بۇل پاندەميا شەكتەۋلەرى كۇشىنە ەنبەگەن 2019 جىلدىڭ سايكەس كەزەڭىمەن سالىستىرعاندا شامامەن 5 ەسە ارتىق، دەپ جازادى Almaty-akshamy.kz DataHub Telegram ارناسىنا سىلتەمە جاساپ.
"دەمالىس ۋاقىتىنا تۇسپا-تۇس كەلەتىن ءۇشىنشى توقسان تۋريزم ءۇشىن ءداستۇرلى تۇردە قولايلى ماۋسىم بولىپ ەسەپتەلەدى. ءبىراق تا، بيىلعى ماۋسىمداعىداي 109،82 ملرد تەڭگە تابىس بۇدان بۇرىن تىركەلمەگەن. مىسال رەتىندە ايتار بولساق، 2021 جىلى شىلدە-قىركۇيەك ارالىعىندا بۇل كورسەتكىش 17،99 ملرد تەڭگە، 2020 جىلى 7،04 ملرد تەڭگە، 2019 جىلى 16 ملرد تەڭگە، 2018 جىلى 11،32 ملرد تەڭگە بولعان. بۇدان بولەك، 2022 جىلدىڭ ەكىنشى توقسانىنداعى كورسەتكىش تە وعان بەلگىلى ءبىر دەڭگەيدە ىقپال ەتتى (55،49 ملرد تەڭگە)"، - دەلىنگەن حابارلامادا.
تۋريستىك كومپانيالار پاندەميادان كەيىن ءوز جۇمىسىن جىلدام رەتكە كەلتىرە الدى. 2021 جىلى بۇرىنعى تابىستارىنا قول جەتكىزدى.
ساراپشىلاردىڭ سوزىنشە، بىلتىرعى تۋريستىك كومپانيالار تابىسىنىڭ ارتۋ سەبەبىن ناقتى ءتۇسىندىرۋ قيىن.
"تۋريستىك كومپانيالار مەن وپەراتورلار تابىسىنىڭ ارتۋىنا ءبىرقاتار فاكتورلار اسەر ەتۋى مۇمكىن. وعان پتر-تەستىلەر مەن كوۆيد پاسپورتتارىنىڭ كۇشىن جويۋ، تۋريستىك پاكەتتەر قۇنىن 30%-عا ۇلعايتۋ جاتادى. دەسەك تە، قازاقستاندىقتاردىڭ ساتىپ الۋ قابىلەتى، سونداي-اق تۋريستىك اعىنداردىڭ ءالى دە بولسا قالپىنا كەلمەگەنىن ەسكەرەتىن بولساق، وسىنشالىق ءوسىم بولماۋى كەرەك ەدى"، - دەدى ساراپشىلار.