قۇجات سەناتقا جىبەرىلەدى.
ءماجىلىستىڭ جالپى وتىرىسىندا "قازاقستان رەسپۋبليكاسىنىڭ كەيبىر زاڭنامالىق اكتىلەرىنە مىندەتتى الەۋمەتتىك مەديسينالىق ساقتاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" ەكىنشى وقىلىمدا قابىلداندى، دەپ حابارلايدى inbusiness.kz سايتى.
قۇجاتتى دەپۋتات گۇلدارا نۇرىم تانىستىردى.
"زاڭ جوباسى مەملەكەتتىڭ مىندەتتى الەۋمەتتىك مەديسينالىق ساقتاندىرۋ سالاسىنداعى قىزمەتىنىڭ قۇقىقتىق جانە ۇيىمداستىرۋشىلىق نەگىزدەرىن جەتىلدىرۋگە باعىتتالعان. زاڭ جوباسى مەملەكەتتىك بازالىق مەديسينالىق كومەكتىڭ ءبىرىڭعاي توپتاماسىن قالىپتاستىرۋعا، جۇمىسسىز ادامداردىڭ جانە الەۋمەتتىك ءال-اۋقات دەڭگەيى داعدارىستى، مۇشكىل ادامداردىڭ مەديسينالىق كومەككە قولجەتىمدىلىگىن قامتاماسىز ەتۋگە، سونداي-اق ءمامس جۇيەسىنە مەملەكەت جارنالارىنىڭ مولشەرلەمەلەرىن كەزەڭ-كەزەڭىمەن وزگەرتۋگە باعىتتالعان قۇقىقتىق نورمالاردى كوزدەيدى"، - دەلىنگەن ءماجىلىس تاراتقان حابارلامادا.
اقپاراتقا سايكەس، زاڭسىز مەديسينالىق قىزمەتتى جۇزەگە اسىراتىن دەنساۋلىق ساقتاۋ سۋبەكتىلەرىنىڭ ازاماتتاردىڭ دەنساۋلىعى مەن ومىرىنە زيان كەلتىرۋىن بولدىرماۋ ءۇشىن دەپۋتاتتار دەنساۋلىق ساقتاۋ سالاسىنداعى ۋاكىلەتتى ورگانعا ءتيىستى ليسەنزيا نەمەسە سەرتيفيكات بولماعان جاعدايدا مەديسينالىق قىزمەت كورسەتۋ سالاسىندا انىقتالعان بۇزۋشىلىقتارعا جەدەل دەن قويۋ شارالارىن قولدانۋ مۇمكىندىگىمەن مەديسينالىق قىزمەت كورسەتۋ سالاسىنداعى قاداعالاۋ فۋنكسياسىن بەرۋدى ۇسىنادى.
قۇجاتتا كورسەتىلگەن نەگىزگى ۇسىنىستار:
- مەديسينالىق كومەككە العاشقى جۇگىنگەن كەزدە جانە الەۋمەتتىك ءمانى بار اۋرۋلاردىڭ الدىن الۋ، دياگنوستيكالاۋ جانە ولاردى ەمدەۋ بويىنشا قىزمەتتەر كورسەتۋ كەزىندە مەديسينالىق-سانيتاريالىق العاشقى كومەكتى جانە جەكەلەگەن سكرينينگتەردى تمككك توپتاماسىندا ساقتاۋ؛
- جۇمىسكەردىڭ اي سايىنعى كىرىسىنىڭ سوماسىنان ءمامس جۇيەسىنە اۋدارىمداردى ەسەپتەۋگە ارنالعان شەكتى ەڭ تومەن جالاقىنىڭ 50 ەسەلەنگەن مولشەرىنەن 20 ەسەلەنگەن مولشەرىنە دەيىن جانە جۇمىس بەرۋشىلەردىڭ اۋدارىمدارى مولشەرىنەن – ەڭ تومەن جالاقىنىڭ 40 ەسەلەنگەن مولشەرىنە دەيىن تومەندەتۋ.
بۇدان بولەك ءمامس جۇيەسىنىڭ تارتىمدىلىعىن قامتاماسىز ەتۋ ماقساتىندا زاڭ جوباسىندا جارنالاردى ۇزدىكسىز تولەگەن ادامدار ءۇشىن مىندەتتى الەۋمەتتىك مەديسينالىق ساقتاندىرۋ جۇيەسىندە مەديسينالىق كومەك الۋ قۇقىعىن ولاردى تولەۋ توقتاتىلعان ساتتەن باستاپ التى ايعا دەيىن ساقتاۋ ۇسىنىلادى.
بۇدان باسقا، الەۋمەتتىك مەديسينالىق ساقتاندىرۋ قورى مەن دەنساۋلىق ساقتاۋ سۋبەكتىلەرىنىڭ قارجىلىق قىزمەتىنىڭ اشىقتىعىن كۇشەيتۋ ماقساتىندا دەپۋتاتتار:
- ءمامس جۇيەسىندەگى قارجى قاراجاتىنىڭ قوزعالىسى تۋرالى مالىمەتتەردى رەسمي ينتەرنەت-رەسۋرستاردا مىندەتتى تۇردە جاريالاۋ؛
- قىزمەتتەردى ساتىپ الۋ شارتى بويىنشا مىندەتتەمەلەردى ورىنداماعان نەمەسە تيىسىنشە ورىنداماعان كەزدە دەنساۋلىق ساقتاۋ سۋبەكتىلەرىنەن قاراجاتتى قايتارۋ بويىنشا نورمالاردى قابىلدادى.