ەلدە ءۇشىنشى توقساندا ونلاين وقۋ جالعاسا بەرە مە؟

ق ر ءبىلىم جانە عىلىم مينيسترلىگى ءۇشىنشى توقسانداعى مەكتەپ وقۋشىلارىنىڭ وقۋ فورماتى قالاي بولاتىنىن ءتۇسىندىردى، دەپ حابارلادى Almaty-akshamy.kz.

مەكتەپكە دەيىنگى جانە ورتا ءبىلىم كوميتەتى ءتورايىمى گۇلميرا كاريموۆانىڭ ايتۋىنشا، III توقسان 18 ناۋرىزعا دەيىن جالعاسادى. وقۋ ءارتۇرلى فورماتتا بولادى. رەسپۋبليكالىق ماڭىزى بار ءۇش قالانىڭ وقۋشىلارى ازىرشە ونلاين رەجيمدە ءبىلىم الادى.

«ءبىزدىڭ مينيسترلىكتىڭ ۇستانىمى مەكتەپ وقۋشىلارىنىڭ ءداستۇرلى فورماتتا وقىعانى جانە سول ءۇشىن دە بار جاعدايدى جاسايدى. دەگەنمەن ەپيدجاعدايدىڭ كۇردەلەنە تۇسۋىنە بايلانىستى ەلىمىزدىڭ 3 قالاسىندا نۇر-سۇلتان، الماتى جانە شىمكەنتتە وقۋشىلار قاشىقتان، يانعي ونلاين فورماتتا وقيتىن بولادى. قازىرگى ۋاقىتتا مەكتەپتەردى تەحنيكالىق تۇرعىدان قامتۋ جۇمىسى اياقتالىپ جاتىر. 1-2 سىنىپ وقۋشىلارى ولاردىڭ جاس ەرەكشەلىگىن ەسكەرە وتىرىپ ساباقتى مەكتەپكە كەلىپ وقيدى. 3-5 سىنىپ وقۋشىلارى كەزەكشى توپ فورماتىندا ءبىلىم الادى. ال قالعان سىنىپتار قاشىقتان وقۋعا كوشۋى ءتيىس. سونداي-اق، مەكتەپتە 600 وقۋشىدان از بولسا، ول مەكتەپكە ءداستۇرلى فورماتتا ءبىلىم بەرۋگە رۇقسات»، – دەدى گۇلميرا كاريموۆا وكق-دە ونلاين وتكەن باسپا ءسوز ءماسليحاتىندا.