بىرەگەي جوبا ءتامامدالدى
«قازاق تىلىندەگى 100 جاڭا وقۋلىق» جوباسى قورىتىندىلاندى، دەپ حابارلايدى Almaty-akshamy.kz.
الەمنىڭ ۇزدىك وقۋلىقتارى جارتى ميلليوننان اسا قازاقستاندىق ستۋدەنتتىڭ قولىنا ءتيدى. «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى قورىتىندىلاندى. ءتارجىمالاۋ جۇمىستارىن «ۇلتتىق اۋدارما بيۋروسى» ۇي̆ىمداستىردى. 100 كىتاپ 4 جىلدا تولىق ءتارجىمالاندى.
ءار وقۋلىق 10 000 دانامەن شىعىپ، ەلىمىزدىڭ وقۋ ورىندارىنا تاراتىلعان. ەلەكتروندى نۇسقالارى «قازاقستاننىڭ اشىق ۋنيۆەرسيتەتى» پورتالىنا ورنالاستىرىلىپ، ەركىن قولدانىسقا بەرىلدى. ونلاين تۇعىرناماعا ءجۇز مىڭنان اسا قولدانۋشى تىركەلگەن. بىلتىرعى وقۋ جىلىنىڭ وزىندە ونداعى كۋرستار 2 ملن رەت پايدالانىلعان.
بۇل ەلىمىزدە بۇرىن-سوڭدى قولعا الىنباعان كەشەندى جوبانىڭ عىلىمي قازاق تىلىنە سالعان ولجاسى مەن كادەگە جاراعان اۋقىمىنىڭ كورىنىسى.
«وقۋلىقتاردىڭ نەگىزىندە قازىرگى زامان تالابىنا ساي قاشىقتان وقۋعا ارنالعان ونلاين كۋرستار دايىندالدى. اتاپ ايتاتىن بولساق، ءار وقۋلىقتىڭ نەگىزىندە بەينەدارىستەر دايىندالىپ، جالپى سانى 200 كۋرس، 5 مىڭنان اسا بەينەدارىس جاسالدى. ولار، اسىرەسە، پاندەميا كەزىندە قاشىقتان وقۋعا وتكەن كەزەڭدە ستۋدەنتتەرگە، وقۋ ورىندارىنا وتە جاقسى كومەكشى قۇرال بولدى دەۋگە بولادى»، - دەدى «ۇلتتىق اۋدارما بيۋروسى» قق اتقارۋشى ديرەكتورى راۋان كەنجەحان ۇلى.