الماتىدا قالا كۇنىندە «كرەاتيۆتى كۆارتال» جاڭا جوباسى ىسكە قوسىلدى. الماتى قالاسى كرەاتيۆتى يندۋستريا باسقارماسىنىڭ باسشىسى قايسار سارىبايەۆ وڭىرلىك كوممۋنيكاسيالار قىزمەتىنىڭ بريفينگىندە ونىڭ بىرەگەيلىگى تۋرالى ايتتى، دەپ حابارلايدى almaty-akshamy.kz
قايسار سارىبايەۆتىڭ ايتۋىنشا، «كرەاتيۆتى كۆارتال» الماتىدا كوپ فۋنكسيونالدى مادەني جانە ىسكەرلىك كەڭىستىككە اينالادى.
«بۇل - كرەاتيۆتى جانە شىعارماشىل كاسىپكەرلەردىڭ بيزنەس-يدەيالارىن جۇزەگە اسىرۋعا جاعداي جاسايتىن بىرەگەي جوبا. ونەر گالەرەيالارى، ءسان بيۋرولارى، قولونەرشىلەردىڭ بازارلارى ءۇشىن رەزيدەنسيالاردى ۇيىمداستىرۋ، شەبەرلىك ساباقتارىن وتكىزۋ ورىندارى، شىعارماشىلىق يندۋستريالار مەن باسقا دا شىعارماشىلىق كەڭىستىكتەردىڭ ونىمدەرى مەن قىزمەتتەرىن جارنامالاۋ بويىنشا ءىس-شارالار ۇيىمداستىرۋ جوسپارلانۋدا»، - دەدى باسقارما باسشىسى.
بۇل جەردە سونداي-اق كرەاتيۆتى كاسىپكەرلىكتى قولداۋ ورتالىعى مەن باسقا دا قىزمەتتەر ورنالاستىرىلادى. ال «Almaty Creative Class» ونلاين ءبىلىم بەرۋ پلاتفورماسىنىڭ ىسكە قوسىلۋى شىعارماشىلىق ادامدارعا ءوز تالانتى بويىنشا اقشا تابۋدى ۇيرەنۋگە، جاڭا باعىتتار مەن ارالاس ماماندىقتاردى اشۋعا مۇمكىندىك بەرەدى.
قايسار سارىبايەۆ وسىنداي باسقا دا جوبالاردى ەسكە سالدى. ماسەلەن، الماتىدا كرەاتيۆتى ستراتەگيانى ىسكە اسىرۋ اياسىندا 2020 جىلدىڭ جەلتوقسانىندا الاتاۋ اۋدانىندا Alatau Creative Hub اشىلدى. وعان كوۆوركينگ الاڭى، بالالارعا ارنالعان 25 تەگىن شىعارماشىلىق ۇيىرمە، شەبەرحانا الاڭى كىرەدى. جىل باسىنان بەرى كەلۋشىلەردىڭ جالپى سانى 100 مىڭنان استام ادامعا جەتتى. مۋزىكا ونەرىنە باسا نازار اۋداراتىن جاستاردىڭ Medeu Creative Hub ورتالىعىن اشۋ جوسپارلانۋدا، DEPO Evolution Park قۇرىلىسى جالعاسۋدا، ياعني كرەاتيۆتى يندۋستريالاردىڭ جوبالارىن ىسكە اسىرۋ ءۇشىن الاڭ قۇرىلاتىن بولادى.