ەلىمىزدەگى ءبىلىم بەرۋ ۇيىمدارىندا «ءبىرتۇتاس تاربيە باعدارلاماسى» اياسىندا «حانتالاپاي» اتتى مەكتەپ جاسىنا دەيىنگى بالالارعا ارنالعان ۇلتتىق ويىنداردىڭ رەسپۋبليكالىق بايقاۋى ءوتتى.
وعان 350 مىڭنان استام بالا قاتىستى، دەپ حابارلايدى Almaty-akshamy.kz وقۋ-اعارتۋ مينيسترلىگىنە سىلتەمە جاساپ.
شارانىڭ ماقساتى - ۇلتتىق ويىندارعا دەگەن قىزىعۋشىلىقتى وياتۋ، قازاق حالقىنىڭ مادەني مۇراسى مەن داستۇرلەرىن دارىپتەۋ.
«بايقاۋ اۋداندىق/قالالىق، وبلىستىق جانە رەسپۋبليكالىق كەزەڭدەردەن تۇردى. مەكتەپ جاسىنا دەيىنگى بالالار ءارتۇرلى كوڭىلدى ويىندارعا قاتىسىپ قانا قويماي، ەلىمىزدەگى ءتۇرلى ۇلتتاردىڭ مادەني مۇراسىمەن جانە داستۇرلەرىمەن تانىستى. بۇل بايقاۋ حالىق اراسىندا ۇمىت بولعان، ۇلتتىق ويىنداردىڭ جاندانۋىنا ىقپال ەتەدى جانە پەداگوگتەردىڭ كاسىبي شەبەرلىگىن ارتتىرادى»، - دەپ اتاپ ءوتتى بالالاردى ەرتە دامىتۋ ينستيتۋتىنىڭ ديرەكتورى گۇلشات وڭلانبەك قىزى.
بايقاۋ جەڭىمپازدارىنا جۇلدەلى ورىندارمەن قاتار كەلەسى نوميناسيالار بەرىلدى:
•«جۇزدەن جۇيرىك، مىڭنان تۇلپار»؛
•«التىن ساقا»؛
•«ۇزدىك ويىنشىلار»؛
•«بەلسەندى ويىنشىلار»؛
•«تاپقىرلار مەن ەپتىلەر»؛
•«ۇزدىك ۇيىمداستىرىلعان ويىن الاڭى».