ءاز-ناۋرىز قارساڭىندا الماتى اسپانىن كۇي كەرنەدى.
بۇگىن، 20 ناۋرىز ەلىمىزدە رەسپۋبليكالىق «كۇي كۇمبىرى» اتتى چەللەندجى ءوتىپ جاتىر. الماتى قالاسىنىڭ بارلىق ءبىلىم بەرۋ ۇيىمدارىندا ءبىر ۋاقىتتا رۋھتى كۇيلەر ورىندالدى دەپ حابارلايدى Almaty-aqshamy.kz.
الماتىداعى №161 ليسەي، №12 مەكتەپ-گيمنازيا، №137 جانە رەسپۋبليكالىق فيزيكا-ماتەماتيكا مەكتەبى قاتارلى ءبىلىم بەرۋ مەكەمەلەرىندە «كۇي كۇمبىرى» اتتى چەللەندجى ءبىر ۋاقىتتا، تۇسكى ساعات 12:00-دە باستالدى. رەسپۋبليكالىق چەللەندجىنى مەكتەپ وقۋشىلارىنان قۇرالعان دومبىرا وركەسترلەرى وتكىزۋدە. ولار قۇرمانعازىنىڭ «سارىارقا»، «بالبىراۋىن»، «اداي» قاتارلى توكپە كۇيلەرىن ءبىر ۋاقىتتا ورىندادى.
اۋقىمدى چەللەندجىنىڭ ءمانى مەن ماقساتى تۋراسىندا ش.ش.ۋاليحانوۆ اتىنداعى №12 مامانداندىلىلعان گيمنازيانىڭ ديرەكتورى قۋانىش جۇمابەك ۇلى بىزگە ءوز پىكىرىن ءبولىستى.
«رەسپۋبليكا كولەمىندە ءوتىپ جاتقان دومبرا چەللەندجىسى ۇلتىمىزدىڭ بولاشاعى جاس ۇرپاقتى ۇلتتىق تانىمدا تاربيەلەۋدىڭ تاماشا ءبىر قۇرالى. وسى جىلدان باستاپ ەلىمىزدە ءبىرتۇتاس تاربيە دەگەن باعدارلاما جۇزەگە اسىپ جاتىر. ونىڭ ماقساتى جالاڭ وقۋ ساپاسىن عانا كوزدە ۇستاماي، جەتكىنشەك بالالاردى ۇلتتىق سانا-سەزىمىن جەتىلدىرۋگە باعىتتالادى. بۇگىنگى اۋقىمدى مادەني شارا دا وسىنىڭ مازمۇندى ءبىر بولىگى، ياعني، ۇلتتىق اسپاپتارىمىزدى، ۇلتتىق قۇندىلىقتارىمىزدى دارىپتەۋ ماقساتىندا ءوتىپ جاتىر»، – دەيدى قۋانىش جۇمابەك ۇلى.
تۇتاس ەل كولەمىندە مەكتەپ وقۋشىلارى قاتىسىپ جاتقان اۋقىمدى چەللەندجىنىڭ ءبىز №12 گيمنازياداعى ءبىر كورىنىسىنە كۋا بولدىق. ءارى ۇلتتىق اسپاپقا قىزىعۋشىلىق تانىتقان جاس جەتكىنشەكتەردىڭ قاتارى مول ەكەنىن انىق اڭعاردىق. اتالعان مامانداندىرىلعان مەكتەپ-گيمنازياسىندا جالپى سانى 70-كە جۋىق وقۋشى دومبىرا ۇيىرمەلەرىنە قاتىسادى. ولاردىڭ اراسىندا حالىقارالىق، رەسپۋبليكالىق ونەر سايىستارىنىڭ جەڭىمپازدار دا بار دەيدى دومبىرا ۇيىرمەسىنىڭ جەتەكشىسى ايدار ءابىلقاسىموۆ.
«دومبىرا اسپابىن ويناعاندا شاكىرتتەرىمنىڭ ءاردايىم رۋحتانىپ، جەلپىنىپ وتىراتىنىن بايقايمىن. بۇگىن مىنە رەسپۋبليكالىق دەڭگەيدە بۇنداي اۋقىمدى چەللەندجىنىڭ ءوتۋى جاس ۇرپاقتىڭ ساناسىندا ۇلتتىق جادىنى جاڭعىرتۋعا ءوز اسەرى مول بولدى دەپ ويلايمىن»، – دەيدى ايدار مۇراتبەك ۇلى.
ايتا كەتەيىك، مادەني شارا ق ر وقۋ-اعارتۋ مينيسترلىگىنىڭ باستاماسىمەن ناۋرىز مەرەكەسىنە وراي وتكىزىلىپ وتىرعان اۋقىمدى رەسپۋبليكالىق اكسيا.
