اتا-انالار ەندى بالالارىنا ارنايى SIM-كارتا الدىرۋى مۇمكىن.
بۇل ەڭ الدىمەن جەتكىنشەكتەردىڭ كيبەرقاۋىپسىزدىگىن قامتاماسىز ەتۋ ءۇشىن قاجەت. تىڭ باستامانى وقۋ-اعارتۋ ۆيسە-مينيسترى ەدىل وسپان وسىدان بىرەر اپتا بۇرىن كوتەرگەن ەدى، دەپ حابارلايدى aqshamnews.kz 24.kz-كە سىلتەمە جاساپ.
بالالارعا ارنالعان ءتاريفى بار SIM-كارتا ەنگىزۋ ارقىلى وقۋ-اعارتۋ مينيسترلىگى ءبىرقاتار ماسەلەنى شەشپەكشى. اتاپ ايتقاندا، اتا-انا باقىلاۋىن كۇشەيتۋ، جەتكىنشەكتەردىڭ كيبەرقاۋىپسىزدىگىن ساقتاپ، جاعىمسىز كونتەنتتەن شەكتەۋ جانە بالانىڭ قاي جەردە جۇرگەنىن انىقتاۋ جەڭىلدەي تۇسپەك. تالداۋ كورسەتكەندەي، قازاقستاندىق بالالار ينتەرنەتكە كوبىنە سمارتفون ارقىلى قول جەتكىزەدى ەكەن. «دەمەك بۇل باستامانىڭ ماڭىزى زور»، – دەيدى وقۋ-اعارتۋ ۆيسە-مينيسترى ەدىل وسپان.
ەدىل وسپان، ق ر وقۋ-اعارتۋ ۆيسە-مينيسترى:
- ءبىزدىڭ ويىمىزشا، وسى SIM-كارتالار ارقىلى بالالارعا كەلىپ تۇسەتىن اقپاراتتى بەلگىلى ءبىر سۇزگىدەن بولادى دەپ سانايمىز. قازىرگى كۇندە بۇل ماسەلە ماماندارمەن پىسىقتالىپ جاتىر. شەتەلدىك تاجىريبە مىندەتتى تۇردە زەرتتەلدى. كوپتەگەن شەتەلدە وسى بايلانىس وپەراتورلارى سيم كارتا ارقىلى، ونداعى ارنايى تاريفتەر ارقىلى ونداعى بالالارعا بەرىلەتىن اقپارات بەلگىلى ءبىر سۇزگىدەن وتەدى. ياعني بەلگىلى ءبىر زياندى، دەنساۋلىعىنا، پسيحيكاسىنا زياندى اقپارات. سول ءۇشىن بايلانىس وپەراتورلارى ونى تەجەپ، شەكتەپ وتىرادى.
جالپى وقۋ-اعارتۋ مينيسترلىگى بالالاردى زياندى اقپاراتتان قورعاۋ تۋرالى 2018 جىلى قابىلدانعان زاڭنامانى جەتىلدىرۋ باستاماسىن كوتەرگەن. بۇگىندە قۇزىرلى ورگان ءتيىستى ساراپتامالىق جۇمىستاردى جۇرگىزىپ جاتىر. IT جانە كوممۋنيكاسيالار جونىندەگى تاۋەلسىز ساراپشى ەۆگەنيي پيتولين بالالار ءتاريفىن ەنگىزۋ ءۇشىن ارنايى زاڭ جوباسى قاجەت ەمەس دەگەن پىكىردە.
ەۆگەنيي پيتولين، IT جانە كوممۋنيكاسيالار جونىندەگى تاۋەلسىز ساراپشى:
- بۇل تىڭ يدەيا ەمەس. ونى بايلانىس وپەراتورلارىنىڭ ارنايى تاريفتەرى ارقىلى جۇزەگە اسىرۋعا ابدەن بولادى. جالپى بالالاردىڭ كيبەرقاۋىپسىزدىگى ءۇشىن بۇل دۇرىس باستاما دەپ ەسەپتەيمىن. مەنىڭشە، بۇعان ارنايى زاڭنىڭ قاجەتى دە جوق. بۇل جەردە باستىسى ۇيىمداستىرۋشىلىق، تەحنولوگيالىق جانە ماركەتينگتىك شەشىمدەردىڭ ۇتىمدىعىن ويلاستىرعان ءجون.
ول ءۇشىن سيفرلىق دامۋ، يننوۆاسيا جانە اەروعارىش ونەركىسىبى مينيسترلىگى بايلانىس وپەراتورلارىمەن بىرلەسە، ءتيىمدى جوبا قۇرۋعا ءتيىس. قۇزىرلى ورگانعا وقۋ-اعارتۋ مينيسترلىگىنىڭ وسى باستاماسىنا قاتىستى ساۋالىمىزدى جولداعان ەدىك. ءبىراق سيفرلىق دامۋ مينيسترلىگى تولىققاندى جاۋاپ بەرۋگە ءازىر دايىن بولماي شىقتى. سەبەبى ونى جان-جاقتى تالداپ، ۇيالى بايلانىس وپەراتورلارىمەن كەلىسىمگە كەلگەنشە ءبىراز ۋاقىت قاجەت. دەمەك بالالار ءتاريفىنىڭ ناقتى قاي ۋاقىتتا ىسكە قوسىلاتىنىن ءبىلۋ ءازىر مۇمكىن ەمەس.