الماتى قالاسى مەن وبلىسىنىڭ پاترۋلدىك پوليسيا ينسپەكتورلارى پارا الدى دەگەن كۇدىككە ءىلىندى.
بۇل تۋرالى سىبايلاس جەمقورلىققا قارسى ءىس-قيمىل اگەنتتىگى مالىمدەگەن، دەپ حابارلايدى Almaty-akshamy.kz.
الماتى وبلىسى بويىنشا Cىبايلاس جەمقورلىققا قارسى قىزمەت الماتى قالاسى مەن الماتى وبلىسى بويىنشا پاترۋلدىك پوليسيانىڭ 7 قىزمەتكەرىنە قاتىستى سوتقا دەيىنگى تەرگەۋدى اياقتادى.
«ولار بىرنەشە رەت پارا الدى دەپ كۇدىككە ءىلىندى. پوليسەيلەر جول قوزعالىسى ەرەجەلەرىن بۇزعان ازاماتتاردى اكىمشىلىك جاۋاپكەرشىلىككە تارتپاعانى ءۇشىن زاڭسىز اقشالاي سىياقى العان. سونىمەن قاتار ينسپەكتورلار جولداردا ءىس جۇزىندە قۇقىق بۇزۋشىلىق جاساماعان ازاماتتاردىڭ اقشاسىن الاياقتىق جولمەن يەمدەنگەن»، - دەپ جازىلعان حابارلامادا.
قازىرگى ۋاقىتتا قىلمىستىق ءىستىڭ ماتەريالدارى سوتقا جولداندى.
«قىلمىستىق پروسەستىك كودەكسىنىڭ 201-بابىنا سايكەس تەرگەۋ مۇددەسىنە وراي وزگە اقپارات جاريا ەتۋگە جاتپايدى. سونىمەن بىرگە، كونستيتۋسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروسەستىك كودەكسىنىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى»، - دەپ جازىلعان حابارلامادا.