تۇڭعىش پرەزيدەنت كۇنى مەرەكەسىنە وراي ءبىز وقىرماندارىمىزدىڭ نازارىنا ەلباسى نۇرسۇلتان نازاربايەۆتىڭ ەل اراسىنا تاراپ كەتكەن، «الماتى اقشامىندا» جاريالانىپ جۇرگەن وتان، تاۋەلسىزدىك، قازاق ءتىلى، ۇلتتىق مۇددە مەن ەل بىرلىگى، جەر تۇتاستىعى، ۇلتارالىق جاراستىق جايلى جان تەبىرەنىستەرى مەن عاقليالىق پايىمداۋلارىنان ازىرلەن گەن تاعىلىمدىق توپتامانىڭ ءبىر پاراسىن ۇسىنىپ وتىرمىز. بۇل وي-تولعانىستاردىڭ استارىندا اتا-بابالار رۋحىنا، تاۋەلسىزدىك مۇراتتارىنا، ۇلتتىق رۋحانيات پەن سالت-ساناعا، داستۇرگە، انا تىلىمىزگە دەگەن قۇرمەت بار، زامانداستارىمىز بەن جاس ۇرپاقتى ەلدىك مۇراتتارعا قايراۋ بار...
***
دۇنيەدە تاۋەلسىز قازاق ەلى بار. الەمدە ەگەمەن قازاقستان بار. ونىڭ كوپ ۇلتتى، تاتۋ، ىنتىماقشىل حالقى بار. قۋاتتى ەكونوميكاسى، سەنىمدى ساياسي جۇيەسى بار.
ەڭ باستىسى – بۇگىننەن نۇرلى، بۇگىننەن كەمەل بولاشاعى بار.
سول كۇنگە بەرىك سەنىمى بار!
***
ءبىز بابالارىمىز اڭساعان تاۋەلسىزدىككە قول جەتكىزىپ، ۇلى دالا توسىندە الەم مو- يىنداعان مەملەكەت قۇردىق.
***
ححI عاسىر قازاق حالقىنىڭ جۇلدىزى جاناتىن عاسىر بولاتىنىنا سەنەمىن.
***
ءبىزدىڭ وتانىمىز بىرەۋ، تاۋەلسىزدىگىمىز– ءبىزدىڭ باستى بايلىعىمىز، ونى ءاربىر ازامات كوزىنىڭ قاراشىعىنداي ساقتاۋى ءتيىس.
***
ءقازىر بوي جارىستىراتىن زامان ەمەس، وي جارىستىراتىن زامان.
***
ۇلتتىق مۇددەگە قىزمەت ەتۋ ءۇشىن اركىم وزگەنى ەمەس، ءوزىن قامشىلاۋعا ءتيىستى.
***
قازاق تاريحىندا قازاق ۇيالاتىن ەشتەڭە جوق.
***
مەملەكەتىمىزدىڭ دىڭگەگى – قازاق حالقى. ەل دە، جەر دە – قازاقتىكى. ەل بولۋدىڭ ۇياتى دا ءبىزدىڭ جۇرتتىڭ موينىندا.
***
ەڭ باستىسى، ءتاتۋ-تاتتى ىنتىماعى جاراسقان كوپ ۇلتتى حالقىمىز بار. ەل دەگەندە، جەر دەگەندە بىلەگىن سىبانىپ، ىسكە دايىن تۇرعان ازاماتتارىمىز بار. سان عاسىرلار بويى تالاي تەپەرىشتى كورسە دە، جايساڭ جانىن، اسەم ءانىن، كۇمبىر كۇيىن، ادەمى ادەت-عۇرپىن، تازا ءتىلىن ساقتاعان ۇلتىمىز بار. مىنە، ءبىزدىڭ باستى بايلىعىمىز – وسى.
***
تاۋەلسىزدىكتىڭ قايتا ورالعانى – ءبىزدىڭ اتا-بابالارىمىزدىڭ سان عاسىرلىق ازاتتىق كۇرەسىنىڭ زاڭدى وتەۋى. جاراتقان يەنىڭ جاساعان ادىلدىگى. اتا-بابالارىمىزدىڭ وسىنشاما بايتاق جەردى اق نايزانىڭ ۇشىمەن، اق بىلەكتىڭ كۇشىمەن قورعاپ قالعانىنىڭ ارقاسى.
***
بويىندا قانى بار، نامىسى بار ءاربىر ازامات: «ەندى تاۋەلسىزدىكتى قالاي كەمەلدەندىرەمىز، ەلدىڭ كوسەگەسىن قايتسەك كوگەرتەمىز؟!» دەپ وي-ساناسىن قامشىلاۋى كەرەك.
***
حالىق كەشپەيتىن ءبىر-اق نارسە بار: ەلدىڭ قولىنا زارىقتىرىپ كەلىپ قونعان باقىت قۇسىنان – تاۋەلسىزدىكتەن ايىرىلۋدى كەشپەيدى.
***
باسقاعا جالتاقتايتىن كۇننەن كەتتىك. بار بايلىعىمىزدى وزىمىزگە بۇيىراتىن ەتتىك.
قوعامنىڭ ساياسي تۇراقتىلىعى مەن بىرلىگىنە جەتتىك.
قىسقاسى، ەگەمەن ەل بولۋدىڭ ەڭ اۋىر بەلەسىنەن وتتىك.
***
ءبىز مەملەكەت قۇردىق. قۇرعاندا دا، اتى بار دا زاتى جوق مەملەكەت ەمەس، بۇكىل ادامزات تانيتىن، تانىپ قانا قويماعان، مويىندايتىن، قۇرمەتتەيتىن مەملەكەت قۇرا الدىق.
***
قازاقستاننىڭ تاۋەلسىزدىگى بەيبىت جولمەن كەلدى. بۇل – ازاتتىق ءۇشىن الىسقان مىڭ-مىڭداعان ازاماتتاردىڭ قاسيەتتى قانىنىڭ وتەۋى. بۇل – بۇكىل تاريحىندا وزگەلەرگە قيانات جاساۋ دەگەندى بىلمەگەن حالىقتىڭ پەيىلىنىڭ قايتارىمى.
***
ءبىزدىڭ ۇرپاق الدىندا بابالار قول جەتكىزگەن يگىلىكتەردى ساقتاۋ، قايتا قالپىنا كەلتىرىلگەن مەملەكەتتىگىمىزدى نىعايتۋ جانە دۇنيەجۇزىلىك قاۋىمداستىق تالاپتارىنا ساي جاڭا ساپالىق دەڭگەيگە كوتەرىلۋ مىندەتى تۇر.
***
قازاق قازاقپەن قازاقشا سويلەسسىن.
***
ۇلتتى كۇشەيتۋدىڭ ءبىرىنشى تەتىگى – ءتىل.
***
قازاقستاننىڭ بولاشاعى – قازاق تىلىندە.
***
انا ءتىلىن قادىرلەۋ – ءار ازاماتتىڭ پەرزەنتتىك پارىزى.
**
بۇگىنگى ءبىزدىڭ تاۋەلسىزدىگىمىزدىڭ قاينار كوزى قازاق حالقىنىڭ سان عاسىرلار بويعى كۇرەسىندە، ازاتتىققا ۇمتىلعان قايسارلىعىندا جاتىر.