قازاقستاندىقتار eGov mobile موبيلدىك قوسىمشاسىندا جانە eGov.kz پورتالىندا نەسيە الۋدان ەرىكتى تۇردە باس تارتاتىندىعى جونىندە ءوتىنىش قالدىرا الادى.
بۇل تۋرالى سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ەندى eGov mobile موبيلدىك قوسىمشاسىندا جانە eGov.kz پورتالىندا نەسيە الۋدان ەرىكتى تۇردە باس تارتۋ جونىندە ءوتىنىش بەرە الاسىزدار. ياعني، بۇگىننەن باستاپ ءاربىر قازاقستاندىق ءوز ەركىمەن نەسيە مەن ميكروقارىز راسىمدەۋگە تىيىم سالا الادى. قىزمەتكە ازاماتتىڭ تەك ءوزىنىڭ ءوتىنىش بەرۋگە مۇمكىندىگى بار. نەسيە مەن ميكروقارىزدى راسىمدەۋگە تىيىم سالۋ 6 ايعا بەلگىلەنەدى جانە مەرزىمى وتكەننەن كەيىن اۆتوماتتى تۇردە الىنىپ تاستالادى. سونداي-اق بۇل شەكتەۋلەردى كەز كەلگەن ۋاقىتتا الىپ تاستاۋعا بولادى، ول ءۇشىن بانكتىك قارىزداردى الۋدان ەرىكتى تۇردە باس تارتۋ قىزمەتىن مەرزىمىنەن بۇرىن توقتاتۋعا ءوتىنىم بەرۋ قاجەت»، - دەپ جازدى مينيستر.
ب.ءمۋسيننىڭ ايتۋىنشا، بۇل فۋنكسيا ادامداردىڭ قاۋىپسىزدىگى ءۇشىن قاجەت. ياعني قازاقستاندىقتار كرەديتتى زاڭسىز رەسىمدەيتىن الاياقتاردان قورعالادى.
ءقازىر ءدال وسىنداي سەرۆيس ءبىرىنشى كرەديتتىك بيۋرونىڭ سايتىندا بار. ءبىراق ول اقىلى. ال ەلەكتروندى ۇكىمەت پورتالىندا كرەديت الۋدان ەرىكتى تۇردە باس تارتۋعا ءوتىنىش تەگىن قابىلدانادى.
قارىز الۋدان ەرىكتى تۇردە باس تارتۋ سەرۆيسى eGov.kz mobile موبيلدىك قوسىمشاسىنىڭ باستى بەتىندە، «تانىمال قىزمەتتەر» بولىمىندە ورنالاستىرىلعان. وسىعان ۇقساس قىزمەت eGov.kz پورتالىنداعى «ازاماتتارعا» - «كەدەن جانە سالىقتار» - «ەكونوميكا جانە قارجى» بولىمىندە ورنالاستىرىلعان.
سەرۆيس ق ر سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى مەملەكەتتىك كورسەتىلەتىن قىزمەتتەر كوميتەتىنىڭ، ءبىرىنشى كرەديتتىك بيۋرونىڭ جانە «ۇلتتىق اقپاراتتىق تەحنولوگيالار» اق اقپاراتتىق جۇيەلەرىنىڭ ينتەگراسياسى ارقاسىندا ىسكە اسىرىلعان.