2022 جىلعى ماۋسىم ايىندا ۇلتتىق ۆاليۋتاداعى كرەديت كولەمى 1،9 پايىزعا ارتتى.
بۇل تۋرالى ق ر قارجى نارىعىن رەتتەۋ جانە دامىتۋ اگەنتتىگىنەن ءمالىم بولدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«2022 جىلعى ماۋسىمدا ەكونوميكاداعى كرەديت 2،7 پايىزعا ۇلعايىپ، 20،1 ترلن تەڭگەنى قۇرادى. 2022 جىلعى ماۋسىم ايىندا جەكە تۇلعالارعا نەسيە 2،9 پايىزعا، ياعني 11،97 ترلن تەڭگەگە دەيىن ارتتى. ال زاڭدى تۇلعالارعا نەسيە 2،4 پايىزعا، 8،08 ترلن تەڭگەگە دەيىن ءوستى»، - دەلىنگەن اگەنتتىك مالىمەتىندە.
2022 جىلعى ماۋسىم ايىندا ۇلتتىق ۆاليۋتاداعى كرەديت كولەمى 1،9 پايىزعا، 18،25 ترلن تەڭگەگە دەيىن ۇلعايدى، ال شەتەل ۆاليۋتاسىنداعى نەسيە سوماسى 11،8 پايىزعا، 1،8 ترلن تەڭگەگە دەيىن ارتتى. 2022 جىلعى 1 شىلدەدەگى جاعداي بويىنشا تەڭگەمەن بەرىلگەن نەسيەنىڭ ۇلەسى 91 پايىزدى قۇرادى.
«2022 جىلعى ماۋسىمدا 2،03 ترلن تەڭگەگە جاڭا كرەديت بەرىلدى، بۇل 2022 جىلعى مامىرعا قاراعاندا 10،9 پايىزعا ارتىق. 2022 جىلعى ماۋسىمنىڭ قورىتىندىسى بويىنشا بانكتەردىڭ ەكونوميكاداعى نەسيەسىنىڭ ەلەۋلى سوماسى ونەركاسىپ (جالپى كولەمدەگى ۇلەسى – 10%)، ساۋدا (26)، قۇرىلىس (4%) جانە كولىك (5%) سالالارىنا تيەسىلى. باسقا سالالارعا نەسيەنىڭ 29،7 پايىزى باعىتتالعان.
«2022 جىلعى ماۋسىمنىڭ قورىتىندىسى بويىنشا، 90 كۇننەن استام مەرزىمى وتكەن بەرەشەگى بار نەسيەنىڭ ۇلەسى كرەديتتىك پورتفەلدىڭ جالپى كولەمىنىڭ 3،6 پايىزىن قۇرادى (2022 جىلدىڭ باسىندا – 3،3%)»، - دەپ اتالىپ وتكەن حابارلامادا.
بۇدان بۇرىن حابارلانعانداي، 2022 جىلعى 1 شىلدەدەگى جاعداي بويىنشا، قازاقستان رەسپۋبليكاسىنىڭ بانك سەكتورىندا 22 ەكىنشى دەڭگەيلى بانك بار. قازاقستاندىق بانكتەر جارتى جىلدا 355 ملرد تەڭگە تازا پايدا تاپقان.