ۇلتتىق قۇندىلىقتار جاڭعىرۋدا
ق ر اقپارات جانە قوعامدىق دامۋ مينيسترلىگىنىڭ قولداۋىمەن «قازاقستان» تەلەراديوكورپوراسياسى تۇسىرگەن «جاڭگىر حان. ساراي سىرى»، «احمەت. ۇلت ۇستازى»، «دومالاق انا»، «تاشەنيەۆ. تايتالاس»، «قانىش. قازىنا»، «مۇقاعالي. بۇل عاسىردان ەمەسپىن» تاريحي تەلەحيكايالارىنىڭ تانىستىرىلىمى ءوتتى، دەپ حابارلايدى Almaty-akshamy.kz
تەلەراديوكورپوراسيا بيىل تۇسىرگەن 16 وتاندىق سەريالدىڭ 6-ۋى تاريحي باعىتتا جارىققا شىقتى.
ۇلت قايراتكەرلەرى احمەت بايتۇرسىن ۇلى، جۇمابەك تاشەنيەۆ، قانىش ساتبايەۆ، مۇقاعالي ماقاتايەۆ، جاڭگىر حان مەن دومالاق انانىڭ ومىرىنە ارنالعان تاريحي تۋىندىلار «Qazaqstan» ارناسىنىڭ ەفيرىنەن تاۋەلسىزدىك مەرەكەسى قارساڭىندا بەرىلە باستايدى.
شاراعا پرەمەر-مينيستردىڭ ورىنباسارى ە.توعجانوۆ، ق ر اقپارات جانە قوعامدىق دامۋ ءمينيسترى ايدا بالايەۆا، دەپۋتاتتار، تەليەۆيدەنيە سالاسىنىڭ ارداگەرلەرى مەن جۋرناليستەر قاتىستى.
«تاريحي سەريالداردىڭ نەگىزگى ماقساتى – تاريحي تۇلعالاردىڭ ءومىر جولىن، سول زاماننىڭ تىنىسىن كورسەتۋ. تاۋەلسىزدىگىمىزدىڭ 30 جىلدىعىنىڭ قارساڭىندا وسى جوبالاردى كورەرمەن نازارىنا ۇسىنىپ، حالىقتىڭ جۇرەگىنە جەتە الساق، سول كەزەڭدەردەگى ءاربىر قيىن ساتتەر مەن جەڭىستى كۇندەردى بۇگىنمەن ۇندەستىرە الساق، بۇل - ۇلكەن جەڭىس. سوعان ۇلكەن قادام جاسالدى»، - دەدى شارانىڭ اشىلۋ سالتاناتىنا قاتىسقان پرەمەر-مينيستردىڭ ورىنباسارى ەرالى توعجانوۆ.
شاراعا ق ر اقپارات جانە قوعامدىق دامۋ ءمينيسترى ايدا بالايەۆا قاتىسىپ، بۇگىندە وتاندىق سەريال نارىعىندا باسەكەلەستىكتىڭ قالىپتاسقانىن اتاپ ءوتتى.
«ءقازىر ءبىزدىڭ كينويندۋسترياداعى ءوز جولىمىز بار. بۇل سالاداعى جۇمىس جىلدان-جىلعا قارقىن الىپ كەلەدى. سوڭعى 5 جىلدىڭ ىشىندە 3500-دەن استام بولىمنەن تۇراتىن 250-گە جۋىق سەريال ءتۇسىرىلدى. وسىدان 10 جىل بۇرىن سەريال دايىندايتىن پروداكشن-كومپانيالار ساۋساقپەن سانارلىق بولسا، بۇگىندە بۇل سالادا باسەكە جوعارى. بۇگىندە تاريحي جوبالار مەملەكەتتىك تەلەارنا ونىمدەرىنىڭ 30%-ىن قۇرايدى. بيىل جىل اياعىنا دەيىن تاريحي باعىتتا 12 سەريال كورەرمەن نازارىنا ۇسىنىلادى. تاۋەلسىزدىكتىڭ قۇنىن ءبىلىپ، ونىڭ قادىر-قاسيەتىن باعالاۋ ءۇشىن، ءبىز وتكەنىمىزدى ۇمىتپاۋىمىز كەرەك. تاريحتا قانداي جولداردان وتتىك، قانداي تۇلعالار بولدى بارلىعىن ۇرپاققا ۇعىندىرۋ كەرەك. سوندىقتان دا پرەزيدەنت ۇلت تۇلعالارىن ناسيحاتتايتىن تاريحي سەريالداردى كوبەيتۋدى تاپسىردى. وسى سەريالدار ارقىلى ءبىز وسكەلەڭ ۇرپاققا تاريحي تۇلعالار مەن ولاردىڭ ونەگەلى ءومىرىن تانىستىرامىز»، - دەدى مينيستر ءوز سوزىندە.
12 ءبولىمدى «جاڭگىر حان. ساراي سىرى» سەريالىنا ارمان سقابىل ۇلى، 6 ءبولىمدى «احمەت. ۇلت ۇستازى» تەلەحيكاياسىنا مۇرات ەسجان، 2 بولىمنەن تۇراتىن «دومالاق انا» تەلەحيكاياسىنا نۇريددين پاتتيەۆ، 4 ءبولىمدى «تاشەنيەۆ. تايتالاس» سەريالىنا جاسۇلان پوشانوۆ، 6 ءبولىمدى «قانىش. قازىنا» تەلەحيكاياسىنا ايگۇل بايبەك، 4 ءبولىمدى «مۇقاعالي. بۇل عاسىردان ەمەسپىن» تاريحي تۋىندىسىنا ازامات ساتىبالدى جەتەكشىلىك ەتتى.
«كورپوراسيانىڭ، جالپى، ەلىمىزدىڭ سەريال ءوندىرىسى تاريحىندا بۇعان دەيىن ءبىر جىل ىشىندە 6 كوپ ءبولىمدى تاريحي تەلەحيكايا تۇسىرىلگەن جوق. سوندىقتان بيىلعى جىل ءبىز ءۇشىن ۇلكەن سىناق پەن تاجىريبەگە تولى جىل بولدى. ەڭ باستىسى، ءدال وسىنداي تاۋەكەلدەر ارقىلى نارىقتا تاريحي سەريال وندىرىسىنە ماشىقتانعان كومپانيالار سانى ارتىپ، سەريالدار ءۇشىن جاڭا بەينەلەر قالىپتاسىپ جاتىر»، - دەدى باسقارما ءتورايىمى ءلاززات تانىسباي شارانىڭ اشىلۋىندا.
باستى كەيىپكەرلەردەن بولەك، سەريالداردا بايدىبەك ءبيدىڭ، ماحامبەت پەن يساتاي، ءالىبي جانگەلدين، ءمىرجاقىپ دۋلات ۇلى، جۇماباي شاياحمەتوۆ، باۋىرجان مومىش ۇلى، دىنمۇحامەد قونايەۆ، فاريزا وڭعارسىنوۆانىڭ رولدەرى كەزدەسەدى.
كەڭەسشى-سەناريستەر قاتارىندا جازۋشى مەدەۋ سارسەكە، اقىن ۇلاربەك نۇرعالىم، باقىت بەدەلحان، ۇلىقبەك ەسداۋلەت، احمەتتانۋشى رايحان يماحانبەت، مۇقاعالي ماقاتايەۆتىڭ كەلىنى باقىتگۇل ماقاتايەۆا، جۇمابەك تاشەنيەۆتىڭ ۇلى سايان جۇمابەك ۇلى مەن كەلىنى فاتيما سادىق قىزى بار.
تاۋەلسىزدىك مەرەكەسىندە ۇلتتىق ارنا ەفيرىنەن العاش بولىپ «احمەت. ۇلت ۇستازى» تەلەحيكاياسى شىعادى.
سونىمەن بىرگە قازاقستان تەلەراديوكورپوراسياسى 2022 جىلى تۇسىرىلەتىن سەريالدارعا اشىق بايقاۋ جاريالاپ، ءقازىر 188 جوبا قابىلدادى. تاريحي ۇلعالارىمىزدىڭ ءومىرىن، بەينەسىن ەكران ارقىلى دارىپتەۋ ىسىندە العا قويعان ماقسات-مىندەتىمىزگە ساي كەلەر جىلى ءاليحان بوكەيحانوۆ، الكەي مارعۇلان، دينا نۇرپەيىسوۆا، ماعجان جۇمابايەۆ تۋرالى تاريحي جوبالار ءتۇسىرۋدى جوسپارلاپ وتىرمىز. عابيت مۇسىرەپوۆتىڭ «ۇلپان» رومانىن ەكرانيزاسيالاۋ ماقساتى تۇر. زاتايەۆيچ پەن برۋسيلوۆسكييدىڭ قازاق مۋزىكا مادەنيەتىنە سىڭىرگەن ەڭبەگى دە ءبىر تەلەحيكاياعا ارقاۋ بولارلىقتاي. بيىل سونىمەن بىرگە كورپوراسيانىڭ تۇركى ەلدەرىنە ورتاق تۇلعا «قورقىت اتا» تۇلعاسىنا ارنالعان تەلەحيكايانىڭ شىعارماشىلىق جۇمىستارى باستالدى. تۇركيا سەريال وندىرۋشىلەرىمەن بىرلەسە قولعا الىنعان تەلەحيكايانىڭ ءتۇسىرىلىمى ءۇش جىلعا جالعاسادى.