سايلاۋعا قاتىسىپ، داۋىس بەرۋ ازاماتتارعا بيلىك ورگاندارىنا ءوز مۇددەسىن بىلدىرۋگە مۇمكىندىك بەرەدى. مۇنداي پىكىردى «عىلىم ورداسى» رمك باس ديرەكتورىنىڭ ورىنباسارى، تاريح عىلىمدارىنىڭ كانديداتى نۇرلان سەيدين ايتتى.
«قازاقستان حالقىنا سانالى ساياسي تاڭداۋ جاساۋعا كونستيتۋسيالىق قۇقىق بەرىلدى. بيۋللەتەندەردى ۋرناعا سالا وتىرىپ، ءبىز حالىقتىق پارلامەنتتى، حالىق قامىن جەيتىن ءماسليحاتتاردى قۇرامىز»، – دەدى نۇرلان سەيدين.
تاريح عىلىمدارىنىڭ كانديداتى ءماجىلىس پەن ءماسليحاتتارعا سايلاۋ مەملەكەت باسشىلىعى جۇيەسىن جاڭعىرتۋدىڭ ءتۇيىنى بولاتىنىن اتاپ ءوتتى.
«كەيىنگى جىلدارى ساياسي جانە كونستيتۋسيالىق رەفورمالار شەڭبەرىندە بيلىك وكىلەتتىكتەرىن پارلامەنتتىڭ ءرولىن ارتتىرۋ جاعىنا قايتا ءبولۋ جۇرگىزىلدى. ساياسي پارتيالاردىڭ، قوعامدىق بىرلەستىكتەردىڭ ءرولى كۇشەيىپ، سوت جۇيەسى جاڭعىرتىلۋدا»، – دەيدى نۇرلان سەيدين.
ساياساتتانۋشى بەلسەندىلىكتىڭ ماڭىزدىلىعىن اتاپ ءوتتى. نۇرلان سەيديننىڭ ايتۋىنشا، ازاماتتار ەل بولاشاعىنا ءوز ۇلەسىن قوسا الاتىن مۇمكىندىگىن جىبەرىپ الماۋعا ءتيىس. ياعني ءارقايسىسىمىز داۋىس بەرۋدەن شەت قالماۋىمىز كەرەك.
«ءبىز بولاشاعىمىزدى جوسپارلايتىن ناۋقاندى سىرتتاي عانا باقىلاپ وتىرماۋىمىز قاجەت. قازاقستاننىڭ كەلەشەگى تۋرالى ءسوز بولعاندا بەلسەندىلىگىمىز اۋاداي كەرەك. ەلدىڭ كەلەشەگى – ءوز قولىمىزدا. ەگەر ءسىز ءوز ەلىڭىزدىڭ سانالى، بەلسەندى ازاماتى بولساڭىز، شەتتە قالماڭىز جانە بۇل مەنىڭ ازاماتتىق ۇستانىمىم»، – دەدى نۇرلان سەيدين.