الماتىدا اقىن، دراماتۋرگ، قازاقستان مەملەكەتتىك سىيلىعىنىڭ لاۋرەاتى، ەڭبەك سىڭىرگەن قايراتكەر نۇرلان ورازالين N301 سايلاۋ ۋچاسكەسىندە داۋىس بەردى.
اقىن بۇگىنگى سايلاۋدا قازاقستان حالقى جۇدىرىقتاي جۇمىلىپ، ءوز كونستيتۋسيالىق قۇقىعىن پايدالانۋى كەرەك ەكەنىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«كەز كەلگەن سايلاۋدىڭ تاريحي سيپاتى بولادى. بۇگىنگى سايلاۋدىڭ باسقا سايلاۋلاردان ءجونى بولەك. سەبەبى، شىنىمەن ەگەر دەموكراتيالىق قۇندىلىقتى باعالايتىن بولساق ءقازىر مول مۇمكىندىك بەرىلىپ جاتىر. بۇل شىن ماعىناسىنداعى سايلاۋدىڭ جاڭا ۇلگىسى دەپ باعالاۋىمىز كەرەك. ءقازىر دۇنيە ءجۇزى ءبىزدىڭ ەلگە قاراپ وتىر. سوندىقتان قازاقستان حالقى جۇدىرىقتاي جۇمىلىپ، ءوز كونستيتۋسيالىق قۇقىعىن دۇرىس پايدالانۋى كەرەك دەپ ەسەپتەيمىن»، - دەدى نۇرلان ورازالين.
ول ءوز كوڭىلىنەن شىققان پارتيا مەن ەل ەرتەڭى ءۇشىن ەڭبەك ەتىپ جۇرگەن ازاماتتارعا داۋىس بەرگەنىن جەتكىزدى.
«مەن ءوز ويىمدا جۇرگەن، كوڭىلىمدە جۇرگەن ويلارىمدى ايتقان پارتياعا داۋىس بەردىم. ونى ءوزىم بىلەمىن. ال ەندى جالعىز مانداتتى كانديداتتاردىڭ ىشىندە بەلگىسىز ازاماتتار كوپ ەكەن. ماعان تاڭداۋ قيىن بولدى. دەگەنمەن، ولاردىڭ اراسىندا ەلدىڭ ەرتەڭى ءۇشىن ەڭبەك ەتىپ جۇرگەن ازاماتتار بار، مەن سولارعا داۋىس بەردىم. ءبىزدىڭ ساقتاناتىن ءبىر نارسەمىز بار – ول جەڭ ۇشىنان جالعاسىپ كەتپەي، شىن جۇيرىكتەردى تاڭداي بىلسەك، جاڭا قازاقستاننىڭ العا قويعان ماقساتى مەن مۇراتىن ورىندايمىز دەپ ويلايمىن. مەن جاڭا قازاقستان ءۇشىن، بولاشاق ۇرپاعىمىز مىقتى، تەكتى بولۋى ءۇشىن داۋىس بەردىم»، - دەدى اقىن نۇرلان ورازالين.