كوپتىڭ تاڭداۋى جاسالاتىن ناۋقانعا نەبارى 19 كۇن قالدى
20-قاراشاداعى ەل پرەزيدەنتىنىڭ سايلاۋى ۇلتتىق دەموكراتيانىڭ كورىنىسى بولماق. ويتكەنى بۇل كۇنى ازاماتتاردىڭ بەلسەندىلىگى مەن قوعامدىق كوزقاراسى انىقتالادى، ساياسي تاڭداۋ جاسالادى. ال ەل بولاشاعى ءۇشىن ماڭىزدى كۇندە اركىمنىڭ اتسالىسۋى – مىندەت.
«ءبىز اۋىزبىرشىلىك پەن ىنتىماقتىڭ ارقاسىندا ەل بولىپ قالۋعا ۇيىمداسقان تۇردە سايلاۋعا ءار ازامات قاتىسۋ كەرەك. ول – ءبىزدىڭ ازاماتتىق پارىزىمىز»، – دەدى مادەنيەتتانۋشى، ق ر ەڭبەك سىڭىرگەن قايراتكەرى نۇرباقىت بوكەباي.
كوپتىڭ تاڭداۋى جاسالاتىن ناۋقانعا نەبارى 19 كۇن قالدى. بۇل ارالىقتا ازاماتتاردىڭ ءار كانديداتتىڭ باعدارلاماسىمەن تانىسۋى شارت. باستىسى، قازاقستاندىقتاردىڭ سايلاۋعا قاتىسۋداعى بەلسەندىلىگى، داۋىس بەرۋدەگى ازاماتتىق كوزقاراسى.
«ءاربىر قازاقستاندىق بۇل سايلاۋعا نەمقۇرايلى قاراماۋى كەرەك. سەبەبى بۇل ءبىزدىڭ تاعدىرىمىز، بۇل ەلىمىزدىڭ، ءتىلىمىزدىڭ، بولاشاعىمىزدىڭ تاعدىرى. سوندىقتان دا مەن بۇكىل وتانداستارىمدى سايلاۋعا تۇگەلدەي قاتىسۋعا شاقىرامىن»، – دەدى اكتەر، ق ر ەڭبەك سىڭىرگەن قايراتكەرى بايعالي ەسەنالييەۆ.