بوستاندىق اۋدانىنىڭ حالقى قالا اكىمىمەن كەزدەسۋدە جول ساپاسىنا قاتىستى شاعىم ايتقان ەدى
الماتىنىڭ ەرمەنساي شاعىناۋدانىنداعى تالاپتى كوشەسى تاقتايداي تەگىستەلدى. جاروكوۆ كوشەسى بويىنداعى گۇلدەر ءۇشىن سۋارۋ جۇيەسى جاڭارتىلدى. ال قازاقفيلم ىقشاماۋدانىندا قۋراعان اعاشتار كەسىلدى. بوستاندىق اۋدانى تۇرعىندارىنىڭ قالا اكىمىمەن كەزدەسۋىندە كوتەرگەن ماسەلەلەرى كوپ ۇزاماي شەشىلىپ جاتىر، دەپ حابارلايدى Almaty-akshamy.kz Almaty.tv-گە سىلتەمە جاساپ.
بۇل – ەرمەنساي شاعىناۋدانىنا قارايتىن تالاپتى كوشەسى. بوستاندىق اۋدانىنىڭ حالقى قالا اكىمى ەربولات دوسايەۆپەن كەزدەسۋدە جول ساپاسىنا قاتىستى شاعىم ايتقان ەدى. ولار كوشەدەگى ويىقتىڭ كوپتىگى جاياۋ جۇرگىنشىگە دە، كولىككە دە ىڭعايسىزدىق تۋدىرادى. سوندىقتان جولدىڭ تەسىلگەن 1 شاقىرىمىنا اسفالت توسەۋدى سۇراپتى. ايتقاندارىن قالا اكىمدىگى ەكى ەتپەدى.
«ءيا، ەندى وسى جەردە ايتا كەتەتىن ءبىر ماسەلە جاڭاعى كورشىلەر جينالىپ، قالا اكىمدىگىنە بارعان ەكەن. ەندى سونىڭ ناتيجەسى جاڭا اسفالت ءتۇستى. ريزامىز. جاقسى ءبارى»، – دەدى قالا تۇرعىنى اقان نۇرمانوۆ.
ال 4-تامىزدا وتكەن قالا اكىمىمەن كەزدەسۋدە قازاقفيلم ىقشاماۋدانىنىڭ تۇرعىندارى قۋراعان اعاشتاردى كەسۋدى سۇراعان. ويتكەنى شىرىگەن بۇتالار ادام ومىرىنە ءقاۋىپ توندىرەدى. جۇرتشىلىقتىڭ بۇل تىلەگى دە ورىندالدى.
«قالا اكىمىنە العىسىمىز شەكسىز! قالا اكىمىمەن كەزدەسۋ كەزىندە ءوتىنىش ايتقانبىز. اعاشتار ءۇيدىڭ شاتىرىنا قۇلاپ، قيىندىق تۋدىرعان ەدى. سونىڭ ءبارى كەسىلدى»، – دەدى قالا تۇرعىنى اباي مولدالييەۆ.
تاعى ءبىر تۇرعىن جاروكوۆ كوشەسىن ەكى بولىككە ءبولىپ تۇرعان جولاق ىشىندەگى جاسىل-جەلەككە الاڭداعان بولاتىن. وندا سۋارۋ جۇيەسى ىستەمەيتىندىكتەن گۇلدەر جاز مەزگىلىندە قۋراپ كەتەدى. سوندىقتان بۇل ماسەلەنى نازارعا الۋدى سۇراعان ەدى. كوپ كۇتتىرمەي تۇيتكىل شەشىمىن تاپتى.
«تۇرعىندار جاروكوۆ كوشەسىنىڭ ورتاسىنداعى جاسىل-جەلەكتەردى سۋعارۋ ءۇشىن سۋ قۇبىرىن قايتادان قالپىنا كەلتىرۋدى وتىنگەن. قازىرگى كەزدە جوندەۋ جۇمىستار ءجۇرىپ جاتىر. قاراشا ايىندا اياقتايمىز. كەلەسى جىلى سۋارۋ جۇمىستارىن وسى جۇيەمەن سۋارامىز دەپ وتىرمىز»، – دەدى بوستاندىق اۋدانى كورىكتەندىرۋ ءبولىمىنىڭ باسشىسى ارمان ميزامبەكوۆ.
اۋداندىق اكىمدىكتەگىلەر الماتى اكىمىمەن كەزدەسۋدە ايتىلعان سۇراقتاردىڭ ءبىرى قالماي شەشىلەتىنىن ايتتى. تەك از عانا كۇتۋ كەرەك. حالىق ۇنىنە قۇلاق اساتىن مەملەكەت تۇجىرىمداماسىن باسشىلىققا الا وتىرىپ، جاۋاپتىلار ايتىلعان سۇراقتاردى رەت-رەتىمەن قاراپ، شەشۋگە تىرىساتىنىن جەتكىزدى.