الماتىدا ءى كرەاتيۆتى يندۋستريالار اپتالىعى باستالدى
الماتىدا كرەاتيۆتى يندۋستريا سالاسىندا 27 مىڭ 200 مىڭ كاسىپورىن تىركەلگەن. ونىڭ تەك 22 مىڭى جۇمىس ىستەپ تۇر. بۇل تۋرالى الماتى قالاسى اكىمىنىڭ ورىنباسارى الىشەر ءابدىقادىروۆ الماتىدا ءى كرەاتيۆتى يندۋستريالار اپتالىعى اياسىندا ۇيىمداستىرىلعان پلەنارلىق سەسسيادا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
سپيكەردىڭ ايتۋىنشا، الماتىدا سوڭعى جىلدارى اقپاراتتىق جۇيەلەردى جوبالاۋ، باعدارلامالىق قامتاماسىز ەتۋ، ۆەب-پورتالداردى ازىرلەۋ، مۋزىكا، كينويندۋستريا، جارناما، ماركەتينگ، ءبىلىم بەرۋ جانە مادەنيەت سالاسىنداعى قىزمەتتەر سانى ءوسىپ كەلەدى.
«2021 جىلى كرەاتيۆتى يندۋستريا سالاسىنداعى بيزنەس سۋبەكتىلەرى 5،4 ملرد تەڭگە سالىق تولەدى. بۇل 2020 جىلمەن سالىستىرعاندا 5% ءوسىم كورسەتتى. جۇمىس ىستەپ تۇرعان ەڭ كوپ كاسىپورىن بوستاندىق (5862 سۋبەكت)، المالى (5214)، مەدەۋ (3845) اۋداندارىندا، ەڭ ازى الاتاۋ (1138) جانە ناۋرىزباي (773) اۋداندارىندا بايقالدى»،- دەدى الىشەر ءابدىقادىروۆ.
كرەاتيۆتى كاسىپكەرلەرگە جۇرگىزىلگەن ساۋالناما بويىنشا الماتىدا كرەاتيۆتى يندۋستريانىڭ دامۋىنا كەدەرگى كەلتىرىپ وتىرعان ءبىرقاتار ماسەلەلەر انىقتالدى.
«الماتىدا كرەاتيۆتى كاسىپكەرلەردىڭ 85%-ى ينفراقۇرىلىمعا مۇقتاج، 56%-ى بيزنەستى جۇرگىزۋ قۇزىرەتىنىڭ دەڭگەيى تومەن ەكەنىن ايتتى، 31%-عا قارجىلاندىرۋ جەتىسپەيدى، 10%-ى بىلىكتى كادرلاردىڭ تاپشىلىعىن ايتتى. بۇل ماسەلەلەر كرەاتيۆتى يندۋستريانى دامىتۋ ءۇشىن ينفراقۇرىلىمدى قالىپتاستىرۋ، كرەاتيۆتى يندۋسترياعا كاسىپكەرلىكتى ىنتالاندىرۋ، كرەاتيۆتى يندۋستريانى دامىتۋ ءۇشىن ءبىلىم، تاجىريبە مەن قۇزىرەتتەردى قالىپتاستىرۋ، ونى تاراتۋ جولىمەن شەشىلەدى»،- دەدى الماتى قالاسى اكىمىنىڭ ورىنباسارى الىشەر ءابدىقادىروۆ.
ەسكە سالايىق، الماتىدا ءى كرەاتيۆتى يندۋستريالار اپتالىعى باستالدى. ول 1-5 قاراشا ارالىعىندا وتەدى.
شاراعا ءبىلىم بەرۋ جانە كرەاتيۆتى حابتار، قازاقستان، رەسەي، بەلارۋس، قىرعىزستان، وزبەكستان، گوللانديا، يتاليا، ۇلىبريتانيا ەلدەرىنىڭ كرەاتيۆتى سەگمەنت ۇيىمدارى قاتىسادى.