مەملەكەت باسشىسىنىڭ بيىلعى جولداۋىندا: «شارۋالاردىڭ قاجەتتى جانار-جاعار مايدى قولايلى باعامەن الۋىن قامتاماسىز ەتۋ كەرەك. اۋىلشارۋاشىلىعى تەحنيكالارىنىڭ دايىندىعىن، تۇقىم مەن تىڭايتقىش قورلارىن قايتا تەكسەرگەن ءجون. ءبىرقاتار وڭىردەگى جاۋىن-شاشىننىڭ ازدىعى ەگىننىڭ شىعىمىن ماندىتپاي، جەم-ءشوپتىڭ جەتىسپەۋىنە اكەپ سوقتىرۋى مۇمكىن ەكەنىن ۇمىتپايىق. جالپى، فەرمەرلەر قاۋىمداستىعىمەن بىرلەسىپ، اگروونەركاسىپ كەشەنىن مەملەكەتتىك قولداۋ تاسىلدەرىن قايتا قاراۋ كەرەك» دەگەنى كوڭىلگە قونىمدى بولدى.
ولاي دەيتىنىم، كەيىنگى جىلدارى اۋىل شارۋاشىلىعى قۇلدىراۋعا كەتتى. ونىڭ سەبەبى تۋرا ەگىن ەگەتىن جانە سول ەڭبەكپەن ەككەن ەگىندى جينايتىن ۋاقىتتا جانار-جاعار مايدىڭ باعاسى شارىقتاپ تاپشى بولا قالاتىنى بار. سوعان توسقاۋىل قويىپ، قايتا جانار-جاعار مايمەن قامتاماسىز ەتۋىمىز كەرەك دەدى. ول دەگەنىڭىز، ءوزىمىزدىڭ جەپ وتىرعان نانىمىز بەن تاعامدا كوپ قولداناتىن جەمىس-جيدەكتەر باعاسى تۇراقتايدى دەگەن ءسوز. تاعى ءبىر ايتا كەتەتىن نارسە – قىمباتشىلىقتى توقتاتۋ.
پرەزيدەنتىمىز: «تاپشىلىقتىڭ جانە ازىق-تۇلىك باعاسىنىڭ ءجونسىز قىمباتتاۋىنىڭ الدىن-الۋ ءۇشىن اۋىل شارۋاشىلىعى ونىمدەرىن مەملەكەتتىك تۇراقتى قورلارعا فورۆاردتىق باعالارمەن ساتىپ الۋ ماسەلەسىن پىسىقتاۋ قاجەت. الماعايىپ وزگەرىستەر جاعدايىندا مەملەكەتتىك اپپارات احۋالعا تەز بەيىمدەلىپ، بارىنشا ۇيلەسىمدى ارەكەت ەتۋگە ءتيسى. شەشىمدى جايباسارلىقپەن قابىلداۋعا، شەنەۋنىكتىك فورماليزمگە جول بەرىلمەيدى. ءقازىر تولىقتاي جۇمىلۋىمىز قاجەت» دەدى. شىنىمەن قىمباتشىلىقتى توقتاتىپ، باعانى تۇراقتاندىرسا، حالىقتىڭ ءال-اۋقاتى ارتادى.