الماتىدا كۇن سايىن باقىلاۋشى بولۋعا كانديداتتار ءۇشىن وقىتۋ ترەنينگ-سەمينارلارى وتكىزىلەدى. بۇگىن مەگاپوليستە سايلاۋدى تاۋەلسىز باقىلاۋ تاقىرىبى بويىنشا «ەل ەرتەڭى» قوعامدىق قورىنان 170 ادام وقۋدان ءوتتى، - دەپ حابارلايدى almaty-akshamy.kz
ترەنينگتەر بارىسىندا سايلاۋ زاڭناماسىنىڭ نەگىزدەرى، ازاماتتىق قوعاممەن ءوزارا ءىس-قيمىل تاسىلدەرى مەن ادىستەرى، سونداي-اق سايلاۋ زاڭناماسىن بۇزعانى ءۇشىن جاۋاپكەرشىلىك جۇكتەلەتىنى پىسىقتالدى.
«ءبىز بۇگىن ترەنينگتەن وتتىك، ونىڭ بارىسىندا ءاربىر باقىلاۋشى ۇستانۋى ءتيىس نەگىزگى مىندەتتەر مەن الگوريتمدەر تۋرالى تەرەڭ ءبىلىپ، حاباردار بولدىق. ياعني، ترەنينگ بارىسىندا ءبىز سايلاۋ زاڭناماسىنىڭ نەگىزدەرىن، ازاماتتىق قوعاممەن ءوزارا ءىس-قيمىل ادىستەرىن زەرتتەدىك، سونداي-اق سايلاۋ زاڭناماسىن بۇزعانى ءۇشىن جاۋاپكەرشىلىك جۇكتەلەتىنى تۋرالى بىلدىك. سونىمەن قاتار، ءبىزدى SMM ەرەجەلەرىمەن، سايلاۋ ۋچاسكەسىندە ءوزىمىزدى قالاي ۇستاۋ كەرەكتىگى جونىندەگى بەلگىلى ەرەجەلەر جانە نورمالارمەن تانىستىردى»، - دەپ بولاشاق باقىلاۋشى ءامينا ءابىلقايىر قىزى ءوز ويىمەن ءبولىستى.
وقۋدان وتكەن تاعى ءبىر قاتىسۋشى كۋرستاردىڭ ماڭىزدىلىعى مەن العان بىلىمدەرىنىڭ بولاشاقتا پايدالىلىعىن اتاپ ءوتىپ، ەموسيالارىمەن ءبولىستى.
«بۇگىن ءبىز ترەنينگتەن ءوتىپ، قىزمەتكەرلەردىڭ، باقىلاۋشىلار مەن سايلاۋشىلاردىڭ رولدەرىندە ءوزىمىزدى سىناپ كوردىك. بۇل پروسەسس بارىسىندا ءبىز كوپ نارسەنى بىلدىك: سايلاۋ پروسەسىندەگى نەگىزگى زاڭنامالار، ازاماتتارمەن ءوزارا ءىس - قيمىل، سايلاۋعا قاتىساتىن ءاربىر ادامنىڭ مىنەز-قۇلىق ەرەجەلەرى جانە ت.ب. مەنىڭ ويىمشا، بۇگىن العان ءبىلىمىمىز بىزگە سايلاۋداعى جۇمىسىمىزدا عانا ەمەس، بولاشاقتا دا كومەكتەسەدى. بۇل العان ءبىلىمنىڭ بارلىعى الداعى ومىردە ۇلكەن تاجىريبە بولادى»، - دەپ اتاپ ءوتتى «ەل ەرتەڭى» مۇشەسى ايدا الپىس.
قاتىسۋشىلار جەكە جانە كۇردەلى ماسەلەلەردى تالداپ، سايلاۋ ۋچاسكەلەرىندە مونيتورينگ جۇرگىزۋ ءتارتىبىن پىسىقتادى. ودان بولەك، ساراپشىلار ءجيى كەزدەسەتىن بۇزۋشىلىقتار تۋرالى اڭگىمەلەپ، باقىلاۋشىلاردىڭ قۇقىقتارى مەن مىندەتتەرىن تالقىلادى، سونىمەن قاتار، بۇزۋشىلىقتار انىقتالعان كەزدەگى باقىلاۋشىنىڭ ارەكەتتەرىن قاراستىردى..