№4 پەرزەنتحانانىڭ اكۋشەرلەرى سالماعى 5 كەلى 100 گرامم نارەستەنى دۇنيەگە اكەلدى، - دەپ حابارلايدى almaty-akshamy.kz
الماتىلىق ناتاليانى باتىر انا دەپ اتايدى. ادەتتە مۇنداي ءىرى نارەستەنى دارىگەرلەر كەسار تىلىگى ارقىلى بوساندىرادى. سول سەبەپتى اكۋشەرلەر ونى تولىق دايىن وتالىق توپتىڭ قاتىسۋىمەن بوساندىردى. بۇل جولى كەسار تىلىگىن جاساۋ قاجەت بولمادى، ءۇش ساعاتتان كەيىن دۇنيەگە ءسابي قىز كەلدى.
«ايەلدە قاعاناق سۋىنىڭ كوپتىگى ورىن الدى، مۇنداي جاعدايدا ءوزى بوسانعاندا انا مەن بالا ءۇشىن بەلگىلى ءبىر ءقاۋىپ بولدى. قاعاناق سۋىنىڭ كوپتىگى كەزىندە اسقىنۋ بولسا، كىندىكتىڭ ءتۇسۋى مۇمكىن ەدى. ال بۇل ءوز كەزەگىندە شۇعىل تۇردە كەسار تىلىگى ارقىلى بوساندىرۋدىڭ كورسەتكىشى بولار ەدى. ۋلترا-دىبىستىق زەرتتەۋ كەزىندە ىشتەگى نارەستەنىڭ سالماعى 4600-4800 بولادى دەپ بولجانعان. كەسار تىلىگى ارقىلى بوسانۋ جوسپاردا بولعان، ءبىراق كەنەتتەن تۋىت باستالىپ كەتتى. ناتاليانى ەكاتەرينا سامارسيەۆا، ينديرا كەمالوۆا ۇشەۋمىز بىرگە جايىلعان وتا بولمەسىندە بوساندىردىق. ءبارىمىز دايىن بولدىق. قاراشانىڭ بىرىندە تاڭعى ساعات 5:30-دا دۇنيەگە قىز بالا كەلدى»، - دەيدى الماتى №4 پەرزەنتحاناسىنىڭ اكۋشەر-گينەكولوگى اينۇر يمانقۇلوۆا.
ءقازىر ناتاليا ۇيگە شىعۋعا دايىندالىپ جاتىر. قىزىن داريا دەپ اتادى. بۇل ناتاليانىڭ وتباسىنداعى ءتورتىنشى بالا.
«مەن 38 جاستامىن، ۇلكەن قىزىم 11دە، ۇلىم 9 جاستا، سودان كەيىن 2،7 جاستاعى تاعى ءبىر ۇلىم بار، مىنە، داريا دەگەن قىزىم دۇنيەگە كەلدى. داريا - سىيلىق دەگەن سوزدەن شىققان. اللا تاعالا بىزگە ءتورت بالا سىيلادى. مەنىڭ ۇلكەن قىزىم دا ءىرى سالماقپەن دۇنيەگە كەلدى - 4100 گرامم. داشا دا ءىرى، بوسانۋ قيىن بولدى. قىزىمدى دۇنيەگە اكەلۋگە كومەكتەسكەن دارىگەرلەرگە راحمەت. ءوز جۇمىسىن جاقسى، ۇيلەسىمدى ورىندايدى، 5 دەپ باعالار ەدىم. اكۋشەرلەردىڭ جۇمىسى وتە اۋىر، ولار ناعىز باتىرلار ەكەن. 2020 جىلى وسىندا ءۇشىنشى بالامدى بوساندىم، ماعان پەرزەنتحانا ۇنادى، سوندىقتان ءتورتىنشى پەرزەنتحاناعا قايتا ورالدىم»، – دەيدى الماتىلىق ناتاليا.
ىشتەگى نارەستەنىڭ ۇلكەن بولۋى ءقازىر سيرەك جاعداي ەمەس دەيدى دارىگەرلەر. №4 پەرزەنتحانادا جىل باسىنان بەرى سالماعى 4 كەلىدەن اساتىن 621 ءسابي دۇنيەگە كەلگەن. ال سالماعى 5 كەلىدەن اساتىن 10 بالا تۋدى.
ىشتە ءىرى نارەستەنىڭ دامۋ سەبەپتەرى: جۇكتى ايەلدە قانت ديابەتىنىڭ بولۋى، گەموليتيكالىق اۋرۋ - بۇل اۋرۋ بالا مەن ونىڭ اناسى اراسىندا رەزۋس قايشىلىعى ورىن العاندا بولادى، تۇقىم قۋالاۋشىلىق، ەكىنشى جانە كەيىنگى جۇكتىلىك، جۇكتى ايەل كومىرسۋتەكتى تاعاممەن شامادان تىس تاماقتانعان جاعدايدا بولۋى مۇمكىن.