ق ر پرەزيدەنتتىگىنە كانديدات قاراقات ابدەن جاستار قاۋىمىمەن كەزدەستى.
كەزدەسۋ بارىسىندا ورتا تەحنيكالىق جانە جوعارى ءبىلىم، جاتاقحانا ماسەلەلەرى سياقتى جاستاردى تولعاندىرىپ جۇرگەن سۇراقتار تالقىلاندى، دەپ حابارلايدى «Almaty aqshamy».kz شتابتىڭ باسپا ءسوز قىزمەتىنە سىلتەمە جاساي وتىرىپ.
«جاستار – ءبىزدىڭ بولاشاعىمىز. بۇگىنگى جاستارعا كومەك – بۇل ءبىزدىڭ ەرتەڭگى كۇنىمىزگە تىكەلەي ينۆەستيسيا. كەزدەسۋ بارىسىندا ءبىز كوپتەگەن وزەكتى تاقىرىپتاردى تالقىلادىق. جاستاردىڭ قوعامنىڭ قوعامدىق-ساياسي پروسەستەرىنە بەلسەندى قاتىسىپ، ءوز يدەيالارىمەن بولىسەتىنى قۋانتادى. ولار ەلدەگى بولىپ جاتقان وقيعالارعا بەي-جاي قارامايدى»، - دەدى قاراقات ابدەن.
سونىمەن قاتار، كەزدەسۋدە جاس ۇرپاقتىڭ بويىندا ۇلتتىق نامىس پەن پاتريوتتىق سەزىمدى قالىپتاستىرۋ، قىزداردىڭ ۇيلەسىمدى تاربيەسىنە كوڭىل ءبولۋدىڭ ماڭىزدى ەكەنى جونىندە دە ءسوز قوزعالدى.
ق.ابدەن سۋيسيدكە قارسى ۇلتتىق جوسپار قۇرۋدى ۇسىندى. ونىڭ ايتۋىنشا، جاستار مەن بالالار اراسىنداعى ءسۋيسيدتىڭ نەگىزگى سەبەپتەرى الەۋمەتتىك ماسەلەلەر جانە قوعامداعى ۇلتتىق، وتباسىلىق قۇندىلىقتاردىڭ قۇلدىراۋى بولىپ تابىلادى. مالىمەتتەرگە سۇيەنسەك، 2018-2022 جج. 18 مىڭعا جۋىق ادام وزىنە قول جۇمساعان. وز-وزىنە قول جۇمساۋ سانى بويىنشا ءبىزدىڭ ەل الەم حالقى اراسىندا 20-ورىندا جانە جاستار مەن بالالار اراسىنداعى سۋيسيد سانى بويىنشا ەلدىڭ ءبىرىنشى ۇشتىگىنە كىرەدى. بۇل بىزدەن شۇعىل ارەكەت ەتۋدى تالاپ ەتەتىن وتە كۇردەلى ماسەلە، - دەيدى ۇمىتكەر.
20 قاراشادا وتەتىن پرەزيدەنت سايلاۋىنا وسك التى كانديداتتى تىركەدى. الماتىلىقتار سايلاۋشىلار تىزىمىندە وزدەرىن https://mapalmaty.kz سايتى ارقىلى، Open Almaty پورتالىندا نەمەسە Telegram Bot @almaty_sailau2022_bot ارقىلى تەكسەرىپ، ءوز سايلاۋ ۋچاسكەسىنىڭ مەكەنجايىن بىلە الادى. سونداي-اق، 1315 نومىرىنە 8.00-دەن 20.00-گە دەيىن قوڭىراۋ شالۋعا بولادى.