پرەزيدەنتتىككە كانديدات مەيرام قاجىكەن دارىگەرلەرمەن دەنساۋلىق ساقتاۋ سالاسىنىڭ وزەكتى ماسەلەلەرىن تالقىلادى.
اق حالاتتىلارمەن كەزدەسۋدە كوتەرىلگەن ماسەلەلەردىڭ ىشىندە ەڭبەكاقىنى ارتتىرۋ، دەنساۋلىق ساقتاۋ سالاسىن قارجىلاندىرۋ، الەۋمەتتىك تولەمدەر قوزعالدى، دەپ حابارلايدى «Almaty aqshamy».kz پرەزيدەنتتىككە كانديدات شتابىنىڭ باسپا ءسوز قىزمەتىنە سىلتەمە جاساپ.
«دامىعان ەلدەردە مەديسينا سالاسىنا دەگەن كوزقاراس وزگەشە. ولاردا بۇل سالانى قارجىلاندىرۋ جالپى ىشكى ءونىمنىڭ 6 پايىزىن قۇرايدى. ال بىزدە 1،5 پايىز. بۇل 4 ەسە تومەن دەگەن ءسوز. ءبىزدىڭ مەديسينا، اسىرەسە مەملەكەتتىك قارجىلاندىرۋ ەسەبىنەن جۇمىس ىستەيتىن ۇيىمدار قارجىلاندىرىلمايدى. ال قارجىلاندىرۋ مەديسينالىق مەكەمەنىڭ بارلىق شىعىندارىن وتەۋگە جەتكىلىكتى بولۋى ءتيىس. نەگىزىندە دەنساۋلىق ساقتاۋ سالاسىنا رەفورمالار جۇرگىزۋ وتە كۇردەلى پروسەسس. ءبىراق كادرلار دايارلاۋ، عىلىمي-زەرتتەۋلەر جۇرگىزۋ جانە ت.ب. باعىتتاردا ناتيجەگە جەتە الامىز»، – دەدى م.قاجىكەن.
سونداي-اق، مەيرام قاجىكەن مەديسينا قىزمەتكەرلەرىنە لايىقتى ەڭبەكاقى تولەۋ قاجەتتىگىن، سونىمەن بىرگە رەسپۋبليكالىق بيۋدجەت تاراپىنان دەنساۋلىق ساقتاۋدىڭ بارلىق سالاسىن ءتيىستى قارجىلاندىرۋ قاجەتتىگىن اتاپ ءوتتى.
«بۇل مەديسينالىق سالادا كادرلاردىڭ جەتىسپەۋشىلىگىنە الىپ كەلەتىن وزەكتى ماسەلە. مەديسينا قىزمەتكەرلەرىنىڭ تاپشىلىعىن جويۋ، دارىگەرلەردىڭ الەۋمەتتىك جانە قۇقىقتىق قورعالۋىن ارتتىرۋ، ولاردىڭ جالاقىسىن ارتتىرۋ ءۇشىن شارالار قاجەت. بۇل مەنىڭ مىندەتتەرىمنىڭ ءبىرى»، - دەدى.
مەيرام قاجىكەن مەملەكەتتىك قارجىلاندىرۋدان باسقا ەرىكتى مەديسينالىق ساقتاندىرۋ جۇيەسىن دامىتۋ قاجەت، دەپ اتاپ ءوتتى. سونداي-اق ۇمىتكەر مەديسينالىق پەرسونال تاپشىلىعى ماسەلەسىن جانە كاسىبي جاۋاپكەرشىلىكتى ساقتاندىرۋ جۇيەسىنىڭ ماسەلەلەرىن تالقىلادى.
پرەزيدەنت سايلاۋى 20 قاراشادا وتەدى.