كوميسسيانىڭ مىندەتى – مونوپولياسىزداندىرۋ بويىنشا ۇسىنىمدار ازىرلەۋ.
مەملەكەت باسشىسىنىڭ تاپسىرماسىن ورىنداۋ ماقساتىندا ق ر ۇكىمەتى جانىنان ەكونوميكانى مونوپولياسىزداندىرۋ جونىندەگى كوميسسيا قۇرىلدى، دەپ حابارلايدى Almaty-akshamy.kz ۇكىمەتتىڭ رەسمي سايتىنا سىلتەمە جاساپ.
كوميسسيا قۇرامىنا سىبايلاس جەمقورلىققا قارسى ءىس-قيمىل، قارجى مونيتورينگى، باسەكەلەستىكتى قورعاۋ جانە دامىتۋ اگەنتتىكتەرىنىڭ ءبىرىنشى باسشىلارى، ۇكىمەت مۇشەلەرى، باس پروكۋراتۋرانىڭ جانە «سامۇرىق-قازىنا» اق وكىلدەرى كىردى.
اتاپ ايتقاندا، كوميسسيا جۇمىسى شەڭبەرىندە تەلەكوممۋنيكاسيا، تەمىرجول ينفراقۇرىلىمى، مەديا اكتيۆتەر جانە باسقا سالالارداعى نەگىزسىز جەكەشەلەندىرىلگەن نىسانداردى مەملەكەت مەنشىگىنە بەرۋ ماسەلەلەرى قارالاتىن بولادى.
بۇگىن كوميسسيانىڭ العاشقى وتىرىسى ءوتتى، وندا ق ر قارجى ءمينيسترى ە. جاماۋبايەۆ، باس پروكۋروردىڭ ورىنباسارى ب. دەمبايەۆ جانە ت. ب. بايانداما جاسادى.
العاشقى وتىرىستىڭ قورىتىندىسى بويىنشا، ءاليحان سمايىلوۆ قارجى مينيسترلىگىنە ۋاكىلەتتى مەملەكەتتىك ورگاندارمەن جانە «سامۇرىق-قازىنا» اق-مەن بىرلەسىپ، ءبىر اپتا ىشىندە ۇكىمەتكە نەگىزسىز جەكەشەلەندىرىلگەن نىسانداردى مەملەكەت مەنشىگىنە بەرۋ تەتىكتەرى بويىنشا ۇسىنىستار ەنگىزۋدى تاپسىردى.