بۇل رەيتينگتە 95 ەلدىڭ كورسەتكىشى قاراستىرىلعان.
دەنساۋلىق ساقتاۋ جۇيەسىنىڭ ساپاسى بويىنشا ەلدەر رەيتينگىندە قازاقستان 95 ەلدىڭ ىشىندە 58-ورىنعا تۇراقتادى، دەپ حابارلايدى Almaty-akshamy.kz ەnergyprom.kz سايتىنا سىلتەمە جاساپ.
قازاقستاندا امبۋلاتورلىق-ەمحانالىق قىزمەتتىڭ باعاسى ءبىر ايدىڭ ىشىندە 2 پايىزعا دەرلىك وسكەن.
دەنساۋلىق ساقتاۋ جۇيەسىنىڭ ساپاسى بويىنشا ەلدەر رەيتينگىندەگى قازاقستاننىڭ يندەكسى 59،99 بولدى. يندەكس نەعۇرلىم جوعارى بولسا، دەنساۋلىق ساقتاۋ جۇيەسى سوعۇرلىم جاقسى بولادى.
دەنساۋلىق ساقتاۋ جۇيەسىنىڭ ساپا يندەكسى دارىگەرلەردى، مەديسينا قىزمەتكەرلەرىن، جابدىقتاردى، قىزمەتتەردىڭ قۇنىن، ت.ب. باعالايدى.
تايۆان، وڭتۇستىك كورەيا جانە جاپونيانىڭ دەنساۋلىق ساقتاۋ جۇيەسى ۇزدىك دەپ تانىلدى. ەڭ ناشار كورسەتكىشتەر ۆەنەسۋەلاعا تيەسىلى بولعان.
رەيتينگكە قاتىسقان تمد ەلدەرىنىڭ ىشىندە قازاقستاننىڭ دەنساۋلىق ساقتاۋ جۇيەسى ۇزدىك بولىپ شىقتى. رەسەي، ۋكراينا، بەلارۋس جانە ءازىربايجاننىڭ كورسەتكىشتەرى قازاقستاننان دا ناشار ەكەن.
اعىمداعى جىلدىڭ اقپان ايىندا امبۋلاتورلىق-ەمحانالىق قىزمەتتەردىڭ باعاسى ايىنا 1،8%-عا، جىلىنا 6،4%-عا ءوستى.
اي سايىنعى ديناميكا بويىنشا دارىگەرلىك امبۋلاتوريالارداعى مامان دارىگەرلەردىڭ قىزمەتى 6،1%-عا، دارىگەردىڭ العاشقى قابىلداۋلارى 2،1%-عا، مەديسينالىق زەرتحانالار مەن رەنتگەن كابينەتتەرىنىڭ قىزمەتتەرى 1،4%-عا، ستوماتولوگيالىق قىزمەتتەر 0،6%-عا ءوستى.
جىلدىق ديناميكا بويىنشا دارىگەرلىك امبۋلاتوريالارداعى مامان دارىگەرلەردىڭ قىزمەتى 9،8%-عا، دارىگەردىڭ العاشقى قابىلداۋلارى 8،5%-عا، مەديسينالىق زەرتحانالار مەن رەنتگەن كابينەتتەرىنىڭ قىزمەتتەرى 5،8%-عا، ستوماتولوگيالىق قىزمەتتەر 4،4%-عا قىمباتتاعان.
2020 جىلى قازاقستاندا بارلىق سالاداعى 76،4 مىڭ دارىگەر (ستوماتولوگتاردى ساناماعاندا) ەسەپكە الىنعان، بۇل ءبىر جىل بۇرىنعىدان 3،2%-عا ارتىق.
دارىگەرلەردىڭ كوپشىلىگى الماتىدا جۇمىس ىستەيدى: 13،5 مىڭ ادام، بۇل جىلىنا 3% ارتىق دەگەن ءسوز. ۇزدىك ۇشتىككە سونداي-اق ەلوردا (9 مىڭ ادام، جىل بويىنشا 4،9% ارتىق) جانە قاراعاندى وبلىسى (6،4 مىڭ ادام، 2،4% ارتىق) كىردى. دارىگەرلەرى ەڭ از ايماق سولتۇستىك قازاقستان وبلىسى بولدى، مۇندا نەبارى 1،7 مىڭ دارىگەر عانا بار ەكەن.
ءاربىر 100 000 ادامعا شاققاندا 405 دارىگەردەن عانا كەلەدى، بۇل ءبىر جىل بۇرىنعىدان 2%-عا كوپ. دارىگەرلەرمەن ەڭ كوپ «قامتاماسىز ەتىلگەن» ەل استاناسى، الماتى جانە قاراعاندى وبلىسى بولسا، ەڭ ناشار جاعداي اقمولا، الماتى جانە تۇركىستان وبلىستارىندا بايقالدى.
ءاربىر 100 مىڭ قازاقستاندىققا ەسەپتەگەندە 14 پروۆيزور، 21 فارماسيەۆت، 323 ماماندانعان دارىگەر، 10 ءتىس دارىگەرى كەلەدى.