اركىمنىڭ اتوم قۋاتىنا قاتىستى تاۋەكەلگە بارىپ ءوز تۇجىرىمىن بىلدىرەتىن سىندارلى شاعى تۋعان ءتارىزدى. كەشەگى پرەزيدەنت جولداۋى وسىنداي ويعا جەتەلەدى. تاقىرىپ مەديا كەڭىستىكتە ءجيى قوزعالعانىمەن، پىكىرلەر سان الۋاندىعى سايابىرسيتىن ەمەس.
قازاقستاندا اتوم ەلەكتر ستانسياسىنىڭ سالىنۋىنا قارسىلىق نەگىزىنەن ەكولوگيالىق قاۋىپ-قاتەرلەرمەن، قاۋىپسىزدىك فاكتورلارىمەن بايلانىستى. كەشەگى تاريحىمىزدىڭ اقتاڭداقتارى، اتوم قارۋىن سىناۋدىڭ زارداپتارى جادىمىزدا تۇر، ۇرەي تۋدىراتىنى دا سوندىقتان. اتوم ءوندىرىسىنىڭ سۋعا، توپىراققا، اۋاعا اسەرى دە اۋقىمدى زەرتتەۋلەردى، بىلىكتى ساراپتاۋلاردى تالاپ ەتەدى.
تارازىنىڭ ەكىنشى باسىندا قازاقستان ەكونوميكاسىنىڭ بولاشاعى، ونىڭ الەۋەتى مەن ءوسۋ قارقىنى تۇر. جىل وتكەن سايىن ەنەرگيا كوزدەرى مەن ونىڭ تۇراقتىلىعىنا دەگەن سۇرانىس وسە بەرەدى. ادامداردىڭ تۇرمىس دەڭگەيىنىڭ ساپاسى دا ەلەكتر قۋاتىمەن تىعىز بايلانىستى. وسى فاكتورلاردى عىلىمدا تەحنولوگيالىق قاتپار، دەڭگەي (تەحۋكلاد) دەگەن ۇعىممەن تۇسىندىرەدى. اتوم تەحنولوگياسىنىڭ تولىق ەنگىزىلۋى ءبىلىم مەن عىلىمعا دا تىڭ سەرپىلىس بەرەدى، جاڭا ماماندار مەن عالىمدار شوعىرى ءوسىپ شىعادى. اەس سونىمەن قاتار بىرنەشە قوسالقى ءوندىرىستى جانداندىرادى جانە سالاارالىق عىلىمدارعا دە قوزعاۋ سالادى.
ەل بولاشاعى ءۇشىن ماڭىزدى بۇل ماسەلەدە كوپ ارگۋمەنتتەرمەن وي تالاستىرۋعا بولادى. پرەزيدەنت قاسىم-جومارت توقايەۆ كەشەگى جولداۋىندا ونى حالىقتىڭ كەڭ تالقىلاۋىنا ۇسىنىپ، رەفەرەندۋم ارقىلى شەشىم قابىلداۋدى ۇسىندى. ءارتۇرلى پىكىرلەر داۋ-دامايعا تۇسكەن جاعدايدا بۇل وتە سالماقتى شەشىم، حالىق تىلەگىنە قۇلاق اسقان بيلىكتىڭ كورەگەندىگى. ونسىز دا قازاقستاننىڭ بارلىق وڭىرلەرىندە اەس قۇرىلىسىنا قاتىستى كوپشىلىك تالقىلاۋلارى بولاتىندىعى ايتىلىپ، باستالىپ تا كەتىپ ەدى.
ەندى رەفەرەندۋمدى وتكىزۋگە قاتىستى ءبىر اۋىز پىكىر بىلدىرسەم دەپ وتىرمىن. قازاقستاننىڭ سيفرلىق تەحنولوگيالاردى ەنگىزۋدەگى جەتكەن جەتىستىكتەرىن نازارعا الا وتىرىپ، وسى رەفەرەندۋمدى ەلەكتروندى وتكىزۋدىڭ مۇمكىندىكتەرى قاراستىرىلسا دەگەن ۇسىنىسىم بار. اقپاراتتىق تەحنولوگيالار ۋنيۆەرسيتەتىنىڭ وكىلى رەتىندە ونىڭ بىرنەشە مۇمكىندىگىنە كوڭىل اۋدارعىم كەلەدى. ءبىر نۇسقاسى، ءموبيلدى قوسىمشا ارقىلى سايلاۋ قۇقىعى بار ازاماتتار تىركەۋدەن وتەدى جانە داۋىس بەرۋ ناقتى ءبىر ۋاقىت شەڭبەرىندە وتەدى، ناتيجەسى اۆتوماتتى جاريالانادى. ەلەكتروندى ۇكىمەت پورتالى ارقىلى داۋىس بەرۋدى تاعى ءبىر نۇسقا رەتىندە قاراستىرۋعا بولادى.
رەفەرەندۋمعا ەلەكتروندى قاتىسۋ ناعىز بەلسەندى ەلەكتوراتتى انىقتاۋعا جول اشادى، بەلسەندى ازاماتتار ءوزىنىڭ ازاماتتىق پوزيسياسىن باتىل قورعاپ شىعادى. اقپاراتتى بۇلىنۋدەن ساقتاۋدىڭ، ازاماتتاردىڭ تاڭداۋىن قورعاۋدىڭ تەحنولوگيالىق مۇمكىندىكتەرى جەتكىلىكتى. وسى جولدا باتىل تاجىريبە جاساپ، ىلگەرى جىلجيتىن دا ۋاقىت كەلگەن ءتارىزدى.