مەملەكەت باسشىسى قاسىم-جومارت توقايەۆتىڭ «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىندا ايقىندالعان ماڭىزدى ستراتەگيالىق مىندەتتەر مەن تەرەڭ ماعىنالى قۇندىلىقتار قاتارىنا كوپتەگەن وزەكتى جانە ماڭىزدى دۇنيەلەر ەندى.
جىل سايىنعى ءداستۇرلى كۇز ايىنىڭ باسىندا جاريالاناتىن جولداۋدىڭ بيىلعى جىلعى باسىمدىلىعى ەكونوميكالىق ماسەلەلەر ەكەنى كەزدەيسوق ەمەس. ويتكەنى، ەلىمىزدىڭ ماتەريالدىق نەگىزدەرى پارمەندى دامۋ جولىنا تۇسە الماي كەلەدى جانە ونىڭ الەۋمەتتىك-ەكونوميكالىق قۇرىلىمى ءالى كۇنگە دەيىن تولىقتاي جاڭعىرا العان جوق. جىلۋ ستانسيالارىنداعى جارىلىستار، توزىعى جەتكەن تەحنيكانىڭ جاڭالانباۋى، بيۋدجەتتىڭ ءتيىمسىز پايدالانۋى سياقتى دەرەكتەر جولداۋدا زاماناۋي كەزەڭنىڭ اششى شىندىعى رەتىندە جاريالاندى. بۇل جەردەگى سىني تالداۋدىڭ تۇپكى استارىندا قازاقستاندىق قوعامدى وركەنيەتتى ەلدەردىڭ قاتارىنا قوسۋ يدەياسى جاتىر. سونىمەن قاتار، مەملەكەت باسشىسى بۇرىنعى جىلدارى ءۇستىرت قانا اتالىپ وتەتىن سۋ پروبلەماسىنا جاڭاشا كوزقاراستى قالىپتاستىرىپ، سۋ ساياساتىن جۇرگىزۋدى ۇسىندى. بولاشاقتا ەلدەر اراسىندا سۋ ماسەلەسى مەملەكەتارالىق قاتىناستاردىڭ ماڭىزدى قىرىنا اينالاتىندىعى بيىلعى جىلدىڭ وزىندە ەرەكشە سەزىلە باستادى.
قازاقستان پرەزيدەنتى «ادىلەتتى قازاقستان» مەن «ادال ازامات» سياقتى ۇعىمداردىڭ ءبىزدىڭ قوعامىمىزدا باسىمدىق تانىتۋى ءتيىس ەكەنىن اتاي كەلىپ، جاستار اراسىنداعى كرەاتيۆتىلىك، موبيلدىلىك، اشىق سۇحباتقا دايىندىق سياقتى قاسيەتتەردىڭ كەڭىنەن تارالۋىنا نازار اۋداردى. قازىرگى كەزەڭدە الدە دە شەشىمىن تاپپاي كەلە جاتقان پروبلەمالاردىڭ قاتارىنا كاسىبي ءبىلىمنىڭ وندىرىسكە ءتيىمدى پايداسىن تيگىزە الماي كەلە جاتقانىن جاتقىزۋعا بولادى. جوعارى وقۋ ورىندارى مەن ءوندىرىس ورىندارى اراسىندا ءوزارا سەرىكتەستىككە نەگىزدەلگەن شىنايى، ادال جانە ءادىل قاتىناستار ورناماسا قوعامداعى، ەكونوميكاداعى پارمەندى دامۋعا، جاڭعىرۋ مەن جاڭارۋلارعا قول جەتكىزە المايمىز. وسى سيپاتتاعى ساپالىق جانە ساندىق كورسەتكىش وقۋ ورنىنىڭ ماڭىزدىلىعى مەن قارجىلاندىرۋىن انىقتاۋى ءتيىس. ءار ءتۇرلى دەڭگەيدەگى باسشى مامانداردىڭ جەكە جاۋاپكەرشىلىكتەرىن ارتتىرماي، ايتىلعان ءسوز ايتىلعان جەرىندە قالۋى دا مۇمكىن.
«حالىق ۇنىنە قۇلاق اساتىن مەملەكەت» قاعيداتىن ناقتى ىسكە اسىرۋىمىز كەرەك دەگەن ءسوز مەملەكەت باسشىسى تاراپىنان ايتىلدى. ونى تەك پرەزيدەنتتىڭ ءوزى عانا جۇزەگە اسىرمايدى. سوندىقتان ايماقتىق دەڭگەيدەگى وسى تەتىكتىڭ جۇمىس ىستەۋ قابىلەتى مەن ناتيجەلەرى ۇنەمى باقىلانىپ، ەسەپ بەرىلىپ وتىرىلۋى ءتيىس. دەموكراتيانىڭ ايقىن كورىنىسى ايشىقتالا ءتۇسۋى قازىرگى كەزەڭدە وتە ماڭىزدى. سەبەبى، ءبىز «ادىلەتتى قازاقستان» مەن «ادال ازامات» ۇعىمدارىن ەرەكشە قۇندىلىقتار رەتىندە دارىپتەپ قانا وركەنيەتتى ەلدىڭ قاتارىنا قوسىلا الامىز.