ەرىكتىلەرگە جىل باسىنان بەرى 1600 ادام حابارلاسىپ، قول ۇشىن سوزۋدى سۇراعان.
رەسمي اقپاراتتار بويىنشا، ەلىمىزدە 18 مىڭعا جۋىق ناشاقور تىركەلگەن. ولاردىڭ باسىم بولىگى – جاستار مەن كامەلەتكە تولماعاندار، دەپ حابارلايدى Alamaty-akshamy،z Qazaqstan.tv-عا سىلتەمە جاساپ.
ايبەك ماناپوۆتىڭ ناشاقورلىق دەرتىنەن ايىققانىنا ەكى جىلعا جۋىقتاپتى. دەگەنمەن، ءالى كۇنگە ەم-دومىن قابىلداپ، دارىگەرلەر مەن پسيحولوگتاردىڭ باقىلاۋىندا ءجۇر. ويتكەنى جەكە تراگەدياسىنىڭ قايتالانۋىنان قورقادى. بۇعان دەيىن ول 13 جىل توقتاۋسىز ەسىرتكى قابىلداعان.
«مەن 15 جاسىمنان ەسىرتكى قابىلداي باستادىم. ال 25 جاسىمدا سينتەتيكالىق ەسىرتكىگە كوشتىم. پسيحوتروپتىق زاتتاردىڭ ءبىر جامانى ادامدى لەزدە تاۋەلدى ەتىپ قويادى. سالدارىنان وتباسىمنان، دوستارىم مەن جيعان-تەرگەنمنەن تۇگەل ايىرىلدىم. وسىدان ەكى جىل بۇرىن «ناركوستوپ» ورتالىعى جايلى ەستىپ، كومەك سۇرادىم. سودان بەرى دەرتىمنەن ايىعىپ كەلەمىن»، - دەيدى قالا تۇرعىنى ايبەك ماناپوۆ.
رەسمي اقپارات بويىنشا الماتىدا ەسىرتكىگە تاۋەلدى، كامەلەتكە تولماعانداردىڭ سانى نەبارى - 12. بۇل رەسمي تىركەلگەندەرى عانا دەيدى ماماندار. پسيحوتروپتىق زاتتاردىڭ قۇربانىنا اينالعانداردىڭ باسىم كوپشىلىگى جەكە كلينيكالارعا جۇگىنەدى نەمەسە ارنايى كولل ورتالىقتارعا حابارلاسادى ەكەن.
«بيىل 1600 قوڭىراۋ كەلىپ ءتۇستى Call-ورتالىققا. ولار تەك كولل ورتالىققا ەمەس، ۆاتساپ، ينستاگرام جەلىلەرىنە جازادى. كوبىسى ول اتا-انالار. ويتكەنى ەسىرتكىگە تاۋەلدىلەردىڭ وزدەرى وتە سيرەك حابارلاسادى. لومكامەن حابارلاساتىندار بار. ءبىزدىڭ ماماندار ءبىر ساعات، ەكى ساعات سويلەسىپ وفلايىن كەزدەسۋگە تارتادى»، - دەيدى ەرىكتى، الەۋمەتتىك جوا جەتەكشىسى نۇرجان جاقىپوۆ.
ورتالىققا حابارلاسقاندار تەگىن ەمدەلۋ ءۇشىن وڭالتۋ ورتالىقتارىنا جىبەرىلەدى. دەسە دە، ەمدەلىپ شىققانداردىڭ بارلىعى بىردەي قالىپتى ومىرگە ورالمايدى ەكەن. ويتكەنى بۇگىنگى تاڭدا ەسىرتكىگە قول جەتكىزۋ تىم وڭاي. ءتىپتى، قۇرامىندا ەسىرتكىسى بار پرەپاراتتار ءدارىحانالاردا اشىق تۇردە ساتىلا بەرەدى.
«جىل باسىنان وسىنداي 10 ءدارىحانا انىقتالدى. اكىمشىلىك كودەكستىڭ 426 بابىنىڭ تالاپتارىن بۇزعانى ءۇشىن سول ءدارىحانالاردىڭ يەلەرى اكىمشىلىك جاۋاپكەرشىلىككە تارتىلعان ەدى. ياعني، دارىگەردىڭ رۇقساتىنسىز قۇرامىندا ناركوتيكالىق دارىلەردى جىبەرگەنى ءۇشىن»، - دەيدى الماتى قالاسى پد رەسمي وكىلى سالتانات ازاربەك.
ءۇش جىل بۇرىن جۇمىسىن باستاعان «ناركوستوپ» جوباسىندا 1000-عا جۋىق ەرىكتى بار. ولاردىڭ كومەگىمەن ەكى جىلدىڭ ىشىندە ەسىرتكىگە تاۋەلدى 27 ادام وڭالتۋ ورتالىعىنا جىبەرىلىپ، سونىڭ 15ء-ى دەرتىنەن تولىعىمەن ايىعىپ شىققان.