توتەنشە جاعدايلار ءمينيسترى مەن وبلىس اكىمى اۋماقتى اۋەدەن بارلادى.
توتەنشە جاعدايلار ءمينيسترى سىرىم ءشارىپحانوۆ پاۆلودار وبلىسى «ەرتىس ورمانى» رەزەرۆاتىنداعى ورتكە قاتىستى سوڭعى مالىمەتتەردى جاريالادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءقازىر جاڭا كۇش كەلدى، جاعدايدى تولىق باقىلاۋعا الامىز. ءورتتىڭ وشاقتارى كونتۋر بويىنشا سوندىرىلەدى. اۆياسيا تاڭەرتەڭنەن دايىن تۇر. تىكۇشاق ءىرى ءورت وشاقتارىن سوندىرۋگە جۇمىلدىرىلادى. تىكۇشاق ىركىلىسسىز جۇمىس ىستەۋى ءۇشىن وبلىس اكىمىنىڭ شەشىمىمەن جانار-جاعارماي بەكەتى ۇيىمداستىرىلدى. سول ارقىلى ۋاقىت ۇنەمدەلەدى، تيىسىنشە تىكۇشاق سۋدى مولىراق شاشادى. جالپى جاعداي باقىلاۋدا» - دەدى سىرىم ءشارىپحانوۆ.
بۇعان دەيىن «ەرتىس ورمانى» رەزەرۆاتى ورتەنىپ جاتقانىن حابارلاعان بولاتىنبىز.
ق ر توتەنشە جاعدايلار مينيسترلىگى باسپا ءسوز قىزمەتىنىڭ حابارلاۋىنشا، 15 شىلدە كۇنى شارباقتى اۋدانىنىڭ ستەپنوە جانە باۋىرتال ورمانشىلىقتارىندا ورماننان ءورت شىقتى.
98 ورامداعى ءورت ەرەكشە باقىلاۋدا، وندا ءورت كۇشەيىپ بارا جاتقانى حابارلاندى.