جوسپار 310 ميلليارد تەڭگەگە ارتىعىمەن ورىندالعان.
قارجى ءمينيسترى ەرۇلان جاماۋبايەۆ رەسپۋبليكالىق بيۋدجەتتىڭ كىرىس بولىگى 16 تريلليون تەڭگەگە 101،9 پايىزعا ورىندالعانىن ايتتى، دەپ حابارلايدى Almaty-akshamy.kz
ونىڭ ىشىندە جەكە تابىس 10 تريلليون 472 ميلليارد تەڭگە. جوسپار 310 ميلليارد تەڭگەگە ارتىعىمەن ورىندالعانىن مالىمدەدى.
ەرۇلان جاماۋبايەۆ كىرىستەگى نەگىزگى ۇلەستى سالىق تۇسىمدەرى الاتىنىن اتاپ ءوتتى.
"ول بويىنشا، جوسپار 210 ميلليارد تەڭگە - 102،1 پايىزعا ارتىعىمەن ورىندالدى. جالپى، رەسپۋبليكالىق بيۋدجەتتىڭ كىرىسى 3،1 تريلليون تەڭگەگە - 42،3 پايىزعا ءوستى. بۇل تاريحتا بولماعان رەكوردتىق كورسەتكىش دەپ ايتا الامىز"، - دەدى قارجى ءمينيسترى.
قارجى مينيسترلىگىنىڭ باسشىسى بيۋدجەتتىڭ كىرىس بولىگى نەگىزىنەن ماكروەكونوميكالىق كورسەتكىشتەرگە، سونداي-اق قارجى مينيسترلىگى جۇرگىزىپ جاتقان سالىقتىق جانە كەدەندىك اكىمشىلەندىرۋدى جاقسارتۋ جانە ولاردى سيفرلاندىرۋ شارالارىمەن بايلانىستى ەكەنىن ايتتى.
بۇعان دەيىن مەملەكەت باسشىسى قاسىم-جومارت توقايەۆ 2023-2025 جىلدارعا ارنالعان رەسپۋبليكالىق بيۋدجەتكە وزگەرتۋلەر ەنگىزۋگە قول قويعان بولاتىن.