ىىم-دە 9 ايداعى جۇمىستىڭ ناتيجەسى قارالدى
ىىم-دە القا وتىرىسى ءوتتى. وعان ورتالىق اپپارات پەن اۋماقتىق پوليسيا بولىنىستەرىنىڭ باستىقتارى، ۆەدومستۆولىق وقۋ ورىندارىنىڭ باسشىلارى جانە ۇلتتىق ۇلاننىڭ وڭىرلىك قولباسشىلىقتارىنىڭ كومانديرلەرى قاتىستى، دەپ حابارلايدى almaty-akshamy.kz
وتىرىس بارىسىندا ىشكى ىستەر ورگاندارىنىڭ اعىمداعى جىلدىڭ توعىز ايىنداعى جۇمىس قورىتىندىسى تۋرالى ايتىلدى.
جالپى، قوعامدىق ورىنداردا، سونىڭ ىشىندە كوشەلەردە جاسالعان قىلمىستىق قۇقىق بۇزۋشىلىقتاردىڭ تومەندەۋى بايقالادى. توناۋ، قاراقشىلىق پەن بۇزاقىلىق ازايعان. كۇش قولدانۋ ارقىلى جاسالعان قىلمىستاردىڭ اشىلۋى جاقساردى.
جاسوسپىرىمدەر اراسىنداعى قىلمىسقا قارسى ءىس-قيمىل جەكە قارالدى. ەرجان سادەنوۆ مەكتەپتەردەگى قاۋىپسىزدىكتى باقىلاۋدى كۇشەيتۋگە باسا نازار اۋداردى. ول اۋماقتىق پوليسيا دەپارتامەنتتەرىنىڭ باسشىلارىنا وقۋ ورىندارىن بەينەباقىلاۋ كامەرالارىمەن جانە دابىل تۇيمەلەرىمەن تولىق قامتۋدى، ولاردى جەدەل باسقارۋ ورتالىقتارىنا شىعارۋدى جانە “سوقىر جەرلەردى” قالدىرماۋدى، كامەلەتكە تولماعاندار ىستەرى جونىندەگى ينسپەكتورلاردىڭ جۇمىسىن قايتا قاراۋدى جانە جەتىلدىرۋدى، بالالاردىڭ قۇقىقتارىن قورعاۋعا جەدەل ۋاكىلدەردى، ۋچاسكەلىك ينسپەكتورلاردى، پاترۋلدەردى جۇمىلدىرۋدى تاپسىردى.
القادا قارالعان تاعى ءبىر وزەكتى ماسەلە جول قاۋىپسىزدىگىن قامتاماسىز ەتۋ بولدى. بيىل قابىلدانعان شارالار ناتيجەسىندە جول-كولىك وقيعالارىنىڭ سانى 4%-عا، قازا بولعاندار سانى 2%-عا تومەندەدى.
سونىمەن بىرگە ەلەكترلى ساموكاتتار مەن موپەد جۇرگىزۋشىلەرىنىڭ قاۋىپسىزدىگىن قامتاماسىز ەتۋ ماسەلەسىنە ەرەكشە نازار اۋدارىلدى. ايتا كەتۋ كەرەك، 1 قىركۇيەكتەن باستاپ جول ءجۇرىسى قاعيدالارىن بۇزعانى ءۇشىن 2079 ساموكات جانە 4838 موپەد جۇرگىزۋشىسى جاۋاپقا تارتىلدى.
ۆەدومستۆو جۇمىسىنىڭ نەگىزگى باعىتتارىنىڭ ءبىرى – ەسىرتكى قىلمىسىنا قارسى كۇرەس. جىل باسىنان بەرى بۇل سالادا پوليسەيلەر 7 مىڭ پروفيلاكتيكالىق ءىس-شارا وتكىزدى. ەل اۋماعىندا 2700 ەسىرتكى سايتى بۇعاتتالدى. ەلەكتروندىق اقپاراتتىق رەسۋرستاردى پايدالانا وتىرىپ، ەسىرتكى زاتتارىن وتكىزۋدىڭ 343 فاكتىسى انىقتالدى.
ەرجان سادەنوۆ بەينەباقىلاۋ جۇيەسىن كەڭەيتۋ قۇقىق بۇزۋشىلىقتىڭ الدىن الۋ مەن قىلمىستاردى اشۋدا نەگىزگى باسىمدىق بولاتىنىن اتاپ ءوتتى. بيىل كامەرالاردىڭ كومەگىمەن 8 مىڭعا جۋىق قىلمىس اشىلىپ، 400 مىڭنان استام اكىمشىلىك قۇقىق بۇزۋشىلىقتىڭ جولى كەسىلدى.
جيىن سوڭىندا ەلىمىزدىڭ باس پوليسەيى دەپارتامەنت باستىقتارىنا جەكە قۇرام اراسىندا زاڭدىلىق پەن ءتارتىپتىڭ ساقتالۋىن باقىلاۋدى كۇشەيتۋدى، كادر ساياساتىن جەتىلدىرۋدى جانە جەرگىلىكتى جەرلەردە پروفيلاكتيكالىق جۇمىستى جانداندىرۋدى تاپسىردى.