2023 جىلعى 15 قازان ساعات 10:40-تا جايىق-كاسپيي وبلىسارالىق باسسەيندىك بالىق شارۋاشىلىعى ينسپەكسياسىنىڭ ماڭعىستاۋ وبلىسى بويىنشا بالىق ينسپەكسياسى باسقارماسى قىزمەتكەرلەرى ءتۇپقاراعان اۋدانىندا باۋتينو اۋىلىنىڭ ماڭىندا 25 ءولى يتبالىق ۇشاسى مەن 33 دانا بەكىرە تۇقىمداس بالىقتاردى تاپتى، دەپ حابارلايدى almaty-akshamy.kz بالىق شارۋاشىلىعى كوميتەتىنىڭ باسپا ءسوز قىزمەتىنە سىلتەمە جاساپ.
بالىق شارۋاشىلىعى كوميتەتىنىڭ حابارلاۋىنشا، تابىلعان تەڭىز جانۋارلارى مەن بالىقتاردىڭ ولەكسەلەرى ءارتۇرلى دارەجەدە ىدىراعان، بۇل ولاردىڭ ءولىمى ءار ۋاقىتتا بولعانىن كورسەتەدى.
"قولدانىستاعى ءوزارا ءىس-قيمىل سحەماسىنا سايكەس، وسى فاكت تۋرالى جۇمىس توبىنىڭ بارلىق مۇشەسىنە (جەرگىلىكتى اتقارۋشى ورگاندار، مامانداندىرىلعان عىلىمي ۇيىمدار، كاسپيي يتبالىعىن زەرتتەۋ جانە وڭالتۋ ورتالىعى، گيدروبيولوگيا جانە ەكولوگيا ينستيتۋتى، قازاقستاندىق قولدانبالى ەكولوگيا اگەنتتىگى، ميكروبيولوگيا جانە ۆيرۋسولوگيا عىلىمي-وندىرىستىك ورتالىعى، وبلىستىڭ ۆەتەريناريالىق قىزمەتى، ەكولوگيا جانە پوليسيا دەپارتامەنتتەرى، تابيعاتتى قورعاۋ پروكۋراتۋراسى) حابار بەرىلدى. يتبالىق تابىلعان جەردەگى جۇمىس توبىن جايىق-كاسپيي وبلىسارالىق بالىق شارۋاشىلىعى باسسەيندىك ينسپەكسياسى باسشىسىنىڭ ورىنباسارى باسقارىپ جاتىر. جۇمىس توبىنىڭ قالعان مۇشەلەرى سۋ، اۋا، توپىراق سىنامالارىن الۋ ءۇشىن جانە مۇمكىن بولسا، ءولى جانۋارلار مەن بالىقتاردىڭ تىندەرىنەن سىنامالار الۋ ءۇشىن بارادى"، - دەگەن بالىق شارۋاشىلىعى كوميتەتى تاراتقان حابارلامادا.
سيرەك كەزدەسەتىن جانە قۇرىپ كەتۋ ءقاۋپى تونگەن جانۋارلار تۇرلەرىنىڭ جويىلۋ دەرەگى بويىنشا قىلمىستىق ءىس قوزعالدى.