كورنەكتى مەملەكەت جانە قوعام قايراتكەرى، ۇلى وتان سوعىسىنىڭ ارداگەرى، قازكسر-نىڭ ەڭبەك سىڭىرگەن مادەنيەت قىزمەتكەرى روزا شامجانوۆانىڭ قۇرمەتىنە مەموريالدىق ەسكەرتكىش-تاقتا قويىلدى.
ول 1942 جىلى قازمۋ-دە وقىپ جۇرگەن كەزىندە ءوز ەركىمەن مايدانعا اتتانىپ، 33-بايلانىس بولىمشەسىندە كوماندير بولعان. سوعىستان كەيىن ماسكەۋ حالىقارالىق قاتىناستار ينستيتۋتىن بىتىرگەن. قازكسر عىلىم اكادەمياسىنىڭ تاريح، ارحەولوگيا جانە ەتنوگرافيا ينستيتۋتىندا عىلىمي قىزمەتكەر، 1951–1953 ج.ج. بۇكىلوداقتىق شەت ەلدەرمەن مادەني بايلانىس قوعامىنىڭ قازاق بولىمشەسى وكىلىنىڭ ورىنباسارى بولعان. 20 جىلدان استام ۋاقىت قازاق دوستاستىق جانە شەتەلدەرمەن بايلانىس قوعامىن باسقارعان.
«روزا اپايمەن 7 جىلداي ەڭبەك اتقاردىم. ول كىسىنىڭ تاباندىلىعىنا قايران قالاتىن ەدىك. بىرگە شەتەلدەردە قازاقستاننىڭ مادەني كۇندەرىن ۇيىمداستىراتىن ەدىك. روزا شامجان قىزى كىشكەنتاي كەزىنەن جەتىمدەر ۇيىندە وسكەن.
سول كەزدەردە مال شارۋاشىلىعىن دامىتۋعا اتسالىسىپ، مال جايىپ، بۇزاۋلاردى باعۋعا كومەكتەسكەن. 13 جاسىندا قازاقستاننان بارعان دەلەگاسيا قۇرامىندا، 1936 جىلى ماسكەۋ قالاسىندا وتكەن بۇكىلوداقتىق مال شارۋاشىلىعىنىڭ وزات جۇمىسشىلارى جينالىسىنا قاتىسقان. ەرىك- جىگەرىنىڭ ارقاسىندا 2 جىلدا ءبىر رەت شەتەلگە مادەنيەتىمىز، ۇلتتىق بولمىسىمىزدى، ادەبيەتىمىزدى تانىتۋعا ولشەۋسىز ۇلەس قوستى»، – دەيدى ق ر ەڭبەك سىڭىرگەن ديپلوماتى، پروفەسسور قايرات يساعالييەۆ.
ءىس-شارانىڭ وتۋىنە الماتى قالاسىنىڭ مادەنيەت باسقارماسى مۇرىندىق بولدى. مەموريالدىق تاقتانىڭ سالتاناتتى اشىلۋ راسىمىنە تۋىستارى، دوس-جاراندارى، مەملەكەت جانە قوعام قايراتكەرلەرى، شاكىرتتەرى قاتىستى.
«انام جۇمىستا قاتال بولعانمەن، ومىردە كىشىپەيىل، ادامدارعا جاناشىر ەدى. ەڭبەككە جاستايىمىزدان ارالاستىردى. ول ءوز ىسىنە ادال ادام ەدى. ەلىمىزدىڭ كوپتەگەن قوعام قايراتكەرلەرىمەن ارالاستى، الەمگە قازاقتى تانىتتى. سوعىستى دا، جوقشىلىقتى دا كوردى. وتباسىنداعى 4 بالادان مەن عانا قالدىم ءقازىر. ەسكەرتكىش-تاقتانى قويۋعا، ورناتۋعا ۇلەس قوسقان جاندارعا العىسىمدى بىلدىرەمىن»، – دەيدى ۇلى ەرلان ءسادۋاقاسوۆ.
تىنىمسىز ەڭبەك پەن ادامگەرشىلىك قاسيەتتەرىنىڭ ارقاسىندا روزا شامجان قىزى ەل ارداقتىسىنا، حالقىنىڭ قالاۋلى تۇلعاسىنا اينالدى. شەتەلدەرمەن مادەني بايلانىستى دامىتۋعا قوسقان زور ۇلەسى ءۇشىن قازاقستان، بولگاريا، موڭعوليا، رۋمىنيا، چەحوسلوۆاكيا، گەرمانيا، تاعى دا باسقا ەلدەردىڭ جوعارى ناگرادالارىمەن ماراپاتتالعان.