الماتى قالاسىنىڭ تۇركسىب اۋدانىنداعى ازاماتتىق حال اكتىلەرىن تىركەۋ بولىمىندە ەرەكشە نەكە قيۋ ءراسىمى ءوتتى. الماتىدا تۋىپ-وسكەن ەرلى-زايىپتى ۆالەريي جانە زويا احمۋرتوۆتار شاڭىراق قۇرعاندارىنا 55 جىل تولعان مەرەيلى گاۋھار تويلارىن تويلادى.
جارتى عاسىردان استام قول ۇستاسىپ، وتباسىلىق ءومىردى بىرگە ءسۇرىپ كەلە جاتقان باقىتتى جانۇياعا تۇركسىب اۋدانىنداعى ازاماتتىق حال اكتىلەرىن تىركەۋ ءبولىمىنىڭ قىزمەتكەرلەرى جانە اكىمدىك وكىلدەرى ەرەكشە قۇرمەت كورسەتىپ، جۇبايلاردىڭ نەكە قيۋ ءراسىمىن ۇيىمداستىردى. جۇبايلارعا قازاقستان رەسپۋبليكاسىنىڭ جاڭا ۇلگىدەگى نەكە كۋالىگى تابىس ەتىلدى. تۇركسىب اۋدانى اكىمدىگىنىڭ ارداگەرلەر كەڭەسىنىڭ ءتوراعاسى عاليا اسقار قىزى مەرەيتوي يەلەرىن قۇتتىقتاپ، گۇل شوقتارى مەن ەستەلىك سىيلىقتارىن بەردى.
سالتاناتتى شاراعا ۆالەريي مەن زويا احمۋرتوۆتاردىڭ ۇلى ەۆگەنيي، قىزى ناتاليا جانە نەمەرەلەرى، وتباسىلىق دوستارى مەن ەت-جاقىندارى قاتىستى. ولار ادەمى جۇپتىڭ نەكە جۇزىكتەرىمەن الماسقان ساتىنە كۋا بولدى. اۋلەتتەگى تاعى ءبىر قۋانىشتى جاڭالىق - 2 اي بۇرىن اتاي مەن اجەيدىڭ شوبەرەسى ماكسيم دۇنيەگە كەلدى.
«وسىدان 55 جىل بۇرىن اق كويلەك كيىپ، قالىڭدىق اتانعان كەزىم ەسىمە ءتۇسىپ، كوزىمە جاس كەلىپ تۇر. ورىمدەي جاپ-جاس ەدىك. ءبىز ءبىر قالادا، ءبىر اۋلادا وستىك. ۆالەريي مەن مەنىڭ اعام جاقسى دوس بولدى. 20 جاسىمدا تۋعان كۇن كەشىندە بىر-بىرىمىزگە سەزىمىمىز ويانىپ، ءسوزىمىز جاراستى، مىنە، سودان بەرى بىرگەمىز»، – دەيدى زويا اجەي.
ۆالەريي احمۋرتوۆ اسكەري بورىشىن وتكەپ كەلگەننەن كەيىن، 1968 جىلى 24 جاسىندا سۇيكىمدى ارۋعا عاشىق بولىپ، ماڭگىلىك ءبىرگە بولۋعا ۇسىنىس جاسايدى. ءوزى سىمباتتى، سپورتتى جانىنا سەرىك ەتكەن، اتقا مىنگەندى جاقسى كورەتىن، ەڭبەكقور، گيتارادا شەبەر وينايتىن ونەرلى جىگىتكە تۇرمىسقا شىعۋعا زويا ارۋ دا قارسى بولماپتى.
«55 جىلدىق وتباسىلىق ءومىردە جارقىن، باقىتتى ساتتەرىمىز كوپ بولدى. ءبىراق ەكى ادامنىڭ ءبىر شاڭىراق استىندا ءتاتۋ-تاتتى ءومىر ءسۇرۋى وڭاي ەمەس. سوندىقتان بۇگىندە وتباسى قۇرىپ جاتقان جاس جۇبايلارعا ءتوزىم، سابىرلىلىق تىلەيمىن. ماحابباتتى ايالاۋ ءۇشىن الدىمەن بىر-بىرىنە دەگەن سىيلاستىق كەرەك. ءبىر وتباسىندا «مەنىكى»، «سەنىكى» دەگەن بولمايدى، ءبارى ورتاق. ءبىر-بىرىن كەشىرە بىلەتىن، ءبىر - ءبىرىنىڭ ءتىپتى كەمشىلىگىن دە جاقسى كورەتىن جۇبايلار باقىتتى بولادى»، – دەيدى ۆالەريي احمۋرتوۆ.