ديماش «سلاۆيان بازارىندا» ونەر كورسەتتى

ۆيتەبسكىدەگى XXX حالىقارالىق ونەر فەستيۆالىنىڭ اشىلۋىندا ديماش قۇدايبەرگەن «ليۋبوۆ پوحوجايا نا سون» جانە «Be With Me» اندەرىن جاندى داۋىستا ورىندادى.

سالتاناتتى اشىلۋ راسىمىنە «سلاۆيان بازارى – 2015» جەڭىمپازى، وسى شاراعا شاقىرىلعان قوناق جانە ەسترادالىق اندەر بايقاۋىنداعى قازىلار القاسىنىڭ مۇشەسى ديماش قۇدايبەرگەن قاتىستى، دەپ حابارلايدى Almaty-akshamy.kz Dimashnews.com سايتىنا سىلتەمە جاساپ.

مەرەيتويلىق فەستيۆالدى بەلارۋس پرەزيدەنتى الەكساندر لۋكاشەنكو اشتى.

«بۇگىنگى ۆيتەبسكىدەگى فەستيۆال – بۇل كاسىبي ۆوكالدىق شەبەرلىكتىڭ بەدەلدى حالىقارالىق بايقاۋى… بۇل ساحنا تايسيا پوۆاليي، رۋسلانا، پەتر ەلفيموۆ، الەنا لانسكايا، ديماش قۇدايبەرگەن جانە باسقا دا كوپتەگەن تانىمال ارتىستەردىڭ جارقىن مانسابىنا باستاۋ بولدى»، – دەپ اتاپ ءوتتى پرەزيدەنت.

«قىمباتتىلارىم، سۇيىكتى تىڭدارماندارىم»! بۇگىن سىزدەردى كورگەنىمە وتە قۋانىشتىمىن. ءدال وسى جەردە، وسىدان تۋرا 6 جىل بۇرىن، مەن ەرەسەك شىعارماشىلىق ومىرگە «جولداما» الدىم»، – دەپ ديماش كورەرمەندەرمەن امانداستى. 

ءارتىس كورەرمەنگە ءوزىنىڭ اتا-اناسىن تانىستىرىپ، جانكۇيەرلەرىمەن بىرگە اناسى سۆەتلانا ايتبايەۆانى تۋعان كۇنىمەن قۇتتىقتادى.