فرانسيا اۋرۋحانالارىندا دارىگەرلەر مەن مەدپەرسونال جەتپەي جاتىر
فرانسيا اۋرۋحانالارىندا جاعداي قيىن. "دەلتادان" جۇقپالىراق دەپ تانىلعان "وميكرون" شتامىن ەكپە العان دارىگەرلەر دە جۇقتىرىپ جاتىر، سول سەبەپتى ولار جۇمىستان ءۇزىلىس الۋعا ءماجبۇر. ال ەكپە سالدىرماعان دارىگەرلەر جۇمىستان شەتتەتىلۋدە، دەپ حابارلايدى اlmaty-akshamy.kz قازاقپاراتقا سىلتەمە جاساپ.
اتالعان احۋال سالدارىنان استانالىق وڭىردە قىزمەتكەرلەردىڭ جەتىسپەۋشىلىگىنەن جانساقتاۋ بولىمدەرىندەگى توسەك-ورىن سانى 20%-عا قىسقاردى. سونىمەن قاتار ستاسيونارلارعا ۆيرۋس جۇقتىرعاندار كوپ تۇسۋدە. اۋرۋحانا جەتەكشىلەرى قىزمەتكەرلەرگە تۇسكەن سالماققا الاڭداۋلى. «ازىرگە ءبىزدىڭ بريگادالار شىدامدىلىق تانىتۋدا، سەبەبى ەشتەڭەگە قاراماي، اۋرۋحاناعا جۇمىسقا كەلۋگە ءماجبۇر. بەسىنشى تولقىننىڭ ەرەكشىلىگى – قازىرگى كەزدە دارىگەرلەر ەكپە العان جاعدايدا اۋرۋحاناعا تۇسپەيتىن ناۋقاستار ءۇشىن كۇرەسىپ جاتىر»، - دەدى Delafontaine اۋرۋحاناسى ديرەكتورىنىڭ ورىنباسارى يوان مۋرە.
كەيبىر اۋرۋحانالارداعى ناۋقاستار قورلاردىڭ تاپشىلىعىنان جاقسى جابدىقتالعان جانە ۆيرۋس جۇقتىرعان ناۋقاستارى از باسقا ەمدەۋ مەكەمەلەرىنە اۋىستىرىلىپ جاتىر. ولاردى تاسىمالداۋ ءۇشىن سانيتارلىق اۆياسيا قولدانىلۋدا. مۇنداي جاعداي ءحالى ناشار ەكى ناۋقاستى ەلدىڭ وڭتۇستىگىندەگى انتيبتان سولتۇستىكتەگى ليللگە اۋىستىرۋ كەزىندە بولعان.
«مۇنىڭ ءبارى وڭاي ەمەس. ءبىز ەكى جىل بۇرىن بولعان احۋالعا قايتا ورالعاندايمىز. حيرۋرگيالىق وتالاردى كەيىنگە قالدىردىق. ودان بولەك، كوروناۆيرۋستىڭ بۇل تولقىنىمەن كۇرەسۋ ءۇشىن ەڭبەك دەمالىسىنان ۋاقىتىنان ەرتە شىقتىق»، - دەيدى مەدبيكە.
كوپ اۋرۋحانالاردا دەمالىس كۇندەرى جۇمىس ىستەۋ، جوسپارداعى وتالاردى كەيىنگە قالدىرۋ قالىپتى جاعدايعا اينالدى. مەديسينالىق قىزمەتكەرلەر مەن ولاردى ۇسىناتىن كاسىپوداقتار دا پرەزيدەنتتىك سايلاۋعا قالعان ءتورت اي ىشىندە بيلىك ورناعان احۋالدى ەسەپكە الىپ، ءتيىستى شەشىم قابىلدايدى دەپ ۇمىتتەنەدى.