«سپۋتنيك لايت» دەگەن قانداي ۆاكسينا؟

2021 جىلى 12 شىلدەدە ق ر دسم مەديسينالىق جانە فارماسيەۆتيكالىق باقىلاۋ كوميتەتى رەسەيلىك «سپۋتنيك لايت» ۆاكسيناسىنا ۋاقىتشا تىركەۋ كۋالىگىن بەردى.

بۇگىن وسى قازاقستاندا ۋاقىتشا تىركەلگەن «سپۋتنيك لايت» ۆاكسيناسى تۋرالى دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ ءتوراعاسى ايجان ەسماعامبەتوۆا ايتىپ بەردى، دەپ حابارلايدى Almaty-akshamy.kz

«سپۋتنيك لايت» - «سپۋتنيك V» سياقتى ۆاكسينا، ءبىراق تەك ءبىرىنشى دوزاسى. «سپۋتنيك لايتتىڭ» سيپاتتاماسى قانداي؟ ول 80% تيىمدىلىك كورسەتتى جانە ەكپەدەن كەيىنگى يممۋنيتەتتىڭ ۇزاقتىعى 6 ايعا دەيىن عانا ساقتالادى. ءقازىر «سپۋتنيك لايتتى» حالىقتىڭ تاڭداۋىنا قاراي قولدانۋ جوسپارلانعان. كىم ەكى ۆاكسينا العىسى كەلمەيدى جانە ونىڭ قىسقا يممۋنيتەتىنە كەلىسەدى، سول ازاماتتارعا «سپۋتنيك لايت» ەگىلەدى»، - دەدى ا. ەسماعامبەتوۆا ورتالىق كوممۋنيكاسيالار قىزمەتىندە وتكەن بريفينگتە.

سپيكەردىڭ ايتۋىنشا «سپۋتنيك لايت» قاجەتتىلىك تۋىنداعان جاعدايدا قايتا ۆاكسينالاۋعا دا پايدالانىلۋى مۇمكىن.

«ازىرگە ءبىز ريەۆاكسيناسيا ماسەلەسىن كوتەرمەدىك، ددسۇ دا ريەۆاكسيناسيا قاجەتتىلىگى تۋرالى ايتپادى. ءبىراق الداعى ۋاقىتتا قانداي دا ءبىر جاڭا دەرەكتەر، ريەۆاكسيناسيا جۇرگىزۋ قاجەتتىگى تۋرالى زەرتتەۋ ناتيجەلەرى پايدا بولسا، «سپۋتنيك لايت» ريەۆاكسيناسيا ءۇشىن دە پايدالانىلۋى مۇمكىن»، - دەيدى ا. ەسماعامبەتوۆا.