بۇل - عالامشارداعى ەڭ اۋقىمدى ەكولوگيالىق اكسيا.
قازاقستاندا «جەر ساعاتى» ەكولوگيالىق اكسياسى 13ء-شى رەت وتەدى، دەپ حابارلايدى Almaty-akshamy.kz Almaty.tv سىلتەمە جاساپ.
قازاقستاننىڭ ەكولوگيالىق ۇيىمدارى قاۋىمداستىعىنىڭ باسقارما ءتوراعاسى ايگۇل سولوۆيەۆا بيىل 26 ناۋرىزدا ەل تۇرعىندارىنا ءبىر ساعاتقا – ساعات 20.30-دان 21.30-عا دەيىن ەلەكتر قۋاتىن پايدالانۋدى توقتاتىپ، ەكولوگيانى ويلاۋدى ۇسىندى. ونىڭ ايتۋىنشا، «جەر ساعاتى» – بۇل عالامشارداعى ەڭ اۋقىمدى ەكولوگيالىق اكسيا.
«ءبىز بارشا قازاقستاندىقتى بىرىگىپ، تابيعاتقا تيگىزەتىن زيانىمىز تۋرالى كەم دەگەندە ءبىر ساعات ويلانۋعا شاقىرامىز»، - دەدى سولوۆيەۆا.
اكسيانىڭ باستى ماقساتى – ءاربىر ادامعا قورشاعان ورتانى ساقتاۋعا ءوز ۇلەسىن قوسۋعا مۇمكىندىگى بار ەكەنىن جەتكىزۋ. اكسياعا ادەتتە ازاماتتار، كومپانيالار جانە ۇكىمەت قاتىسادى. جارىقتى وشىرە وتىرىپ، ولار وزدەرىنىڭ ءومىر سالتىن «جاسىلداندىرۋعا» دايىن ەكەنىن بىلدىرەدى.
«ەگەر قازىرگى ءۇردىس ساقتالاتىن بولسا، وندا 2050 جىلعا قاراي ادامدارعا ەنەرگياعا، سۋعا جانە ازىق-تۇلىككە دەگەن قاجەتتىلىگىن قاناعاتتاندىرىپ، قالدىقتاردى ساقتاۋ ءۇشىن ەكىنشى عالامشار قاجەت بولادى. ءبىز بارشا قازاقستاندىقتى وسى اكسياعا قوسىلۋعا جانە كۇندەلىكتى ادەتىن وزگەرتۋگە، ەنەرگيا مەن جىلۋدى ۇنەمدەۋگە، سۋدى ءتيىمدى پايدالانۋعا، قالدىقتاردى وڭدەپ، كادەگە جاراتۋعا شاقىرامىز»، - دەپ تۇيىندەدى سولوۆيەۆا.
دۇنيەجۇزىلىك جابايى تابيعات قورى (WWF) ورتالىق ازيا باعدارلاماسىنىڭ ديرەكتورى گريگوريي مازمانيانستىڭ ايتۋىنشا، اكسياعا قاتىسۋشىلاردىڭ سانى جىلدان جىلعا ارتىپ كەلەدى.
«اكسيا بارعان سايىن اۋقىمدى سيپاتقا يە بولۋدا. ءبىز بۇكىل الەمدە ءبىر ۋاقىتتا جارىق سونەتىنىن كۇنگە جەتەمىز دەگەن ويدامىن»، - دەپ اتاپ ءوتتى ول.