شاھاردا ءتۇرلى باعىتتا 3611 سپورت كەشەنى بار.
قالالىق سپورت باسقارماسىنىڭ جانىنان ارنايى مونيتورينگتىك توپ قۇرىلدى. ماقسات – مەگاپوليستە ناتيجەسىز سپورت تۇرلەرىن قىسقارتىپ، ورنىنا قاجەتتى دەگەن سەكسيالاردىڭ ساعاتىن كوبەيتۋ. بۇل تۋرالى بۇگىن قالالىق اكىمدىكتە وتكەن جيىن بارىسىندا بەلگىلى بولدى، دەپ حابارلايدى Almaty-akshamy.kz Almaty.tv سىلتەمە جاساپ.
"جۇيەلى جۇمىس الماتىلىق سپورتشىلاردىڭ ءبىر باعىت بويىنشا تۇراقتى تۇردە دامۋىنا ىقپال ەتەدى"، - دەيدى سپورت باسقارماسىنىڭ باسشىسى. كەڭەستە قالاداعى سپورتتىق-مادەني شارالاردىڭ سانىن ازايتۋ ماسەلەسى دە ءسوز بولدى. ماسەلەن، حالىقارالىق تۋرنيرلەردى قوسقاندا الماتىنىڭ وزىندە وتكەن جىلى 1200-گە جۋىق شارا وتكەن. بۇعان جۇمسالعان بيۋدجەتتىڭ قىرۋار قارجىسىن جاسوسپىرىمدەردىڭ سپورت سەكسيالارىنا جۇمساۋ كەرەكتىگى ۇسىنىلدى. سونىمەن قاتار كوپشىلىك ءقازىر بەيجىڭدە ءوتىپ جاتقان XIII قىسقى پاراليمپيادا ويىندارىندا ەلىمىزدىڭ نامىسىن قورعاپ جاتقانداردىڭ ىشىندە الماتىلىق سپورتشىنىڭ بولماعانى سىن دەدى. بۇگىن جۇمىسىن باستايتىن مونيتورينگتىك توپ مۇشەلەرى وسى سىندى ماسەلەلەردىڭ الدىن الۋ جولىندا جۇمىس ىستەمەك.
«بيىل قالاداعى ورتالىق ستاديوندى كۇردەلى جوندەۋدەن وتكىزۋدى جوسپارلاپ وتىرمىز. كۇردەلى جۇمىس ىستەپ قانا قويماي، وعان قوسىمشا الاڭ سالىنادى. سونداي-اق 2022-2024 جىلدارعا سپورتتىق جابدىقتاردى جاڭعىرتۋ جوسپارلانعان. ناتيجەسىندە قالاداعى سپورت مەكتەپتەرىنە زاماناۋي قۇرالدار ساتىپ الىنادى. بۇل سپورتشىلاردىڭ جاتتىعۋ ساپاسىنىڭ ارتۋىنا ىقپال ەتەدى»، – دەدى سپورت باسقارماسىنىڭ باسشىسى رۇستەم بايسەيىتوۆ.
ايتا كەتكەن ءجون، بۇگىندە الماتىدا ءتۇرلى باعىتتا 3611 سپورت كەشەنى بار. ودان بولەك، 3 اۋداندا جاڭا عيمارات سالىنىپ جاتىر. ال "كەمەل" شاعىناۋدانىنداعى بوي كوتەرىپ جاتقان دەنەشىنىقتىرۋ-ساۋىقتىرۋ كەشەنى جۋىردا پايدالانۋعا بەرىلمەك. وندا جەكپە-جەك سپورت تۇرلەرى مەن كوركەم گيمناستيكا زالدارى بار. ودان بولەك، جىل سوڭىنا دەيىن تەننيس ورتالىعىنىڭ قۇرىلىسى اياقتالماق.