پرەمەر-مينيستر اۋاعا تارايتىن زياندى قالدىقتاردى ازايتۋ جونىندە شارالار قابىلداۋ جانە كاربوندى پوليگوندار قالىپتاستىرۋ ءۇشىن جاعداي جاساۋدى تاپسىردى، دەپ حابارلايدى aqshamnews.kz
ۇكىمەت وتىرىسى بارىسىندا پرەمەر-مينيستر ولجاس بەكتەنوۆ «تازا قازاقستان» رەسپۋبليكالىق اكسياسى اياسىندا ازاماتتاردىڭ ەكولوگيالىق مىنەز-قۇلقىن قالىپتاستىرۋ ءۇشىن جاعداي جاساۋدىڭ ماڭىزدىلىعىن اتاپ ءوتتى.
«كەز كەلگەن ازامات ەلىمىزدىڭ كيەلى تابيعاتىن ايالاپ، تۇرعىلىقتى جەرىن اباتتاندىرۋعا ءوز ۇلەسىن قوسا الادى.
ول ءۇشىن ەكولوگيالىق مادەنيەت كۇندەلىكتى ءومىرىمىزدىڭ اجىراماس بولىگىنە اينالۋعا ءتيىس. بارلىق مەملەكەتتىك ورگاندار، بيزنەس پەن بۇكىل قوعام بولىپ وسى جۇمىستارعا بەلسەندى اتسالىسۋىمىز قاجەت»، — دەدى ولجاس بەكتەنوۆ.
كومىرتەگى بەيتاراپتىعىنا قول جەتكىزۋ تۋرالى پاريج كەلىسىمىندەگى مىندەتتەمەلەرگە سايكەس، اۋاعا تارايتىن زياندى قالدىقتاردى ازايتۋ ءۇشىن ءتيىمدى شارالار قابىلداۋ قاجەتتىگى اتاپ ءوتىلدى. وسىعان بايلانىستى ەكولوگيا جانە تابيعي رەسۋرستار مينيسترلىگىنە اكىمدىكتەرمەن بىرلەسىپ، قورشاعان ورتاعا ەميسسيالاردى باقىلاۋدىڭ اۆتوماتتاندىرىلعان جۇيەلەرىن ەنگىزۋدى جەدەل اياقتاۋ تاپسىرىلدى.
پرەمەر-مينيستر قورشاعان ورتاعا، اسىرەسە كاسىپورىندار اينالاسىندا اۋاعا تارالعان زياندى گازداردى ازايتاتىن كاربوندى پوليگوندار قۇرۋ ارقىلى ەكوجۇيە قالىپتاستىرۋدىڭ ماڭىزدىلىعىنا نازار اۋداردى. مۇنداي جوبالاردى ىسكە اسىرۋ ءۇشىن ەكولوگيا جانە تابيعي رەسۋرستار مينيسترلىگىنە زاڭنامالىق تۇزەتۋلەر ازىرلەۋ جونىندەگى تاپسىرما بەرىلدى. سونىمەن قاتار پرەزيدەنتتىڭ ەلدى مەكەندەردە اعاش وتىرعىزۋ تۋرالى تاپسىرماسىن ورىنداۋدىڭ ماڭىزدى ەكەنى اتاپ ءوتىلدى.