دەنساۋلىق ساقتاۋ مينيسترلىگىنىڭ مەديسينالىق جانە فارماسيەۆتيكالىق باقىلاۋ كوميتەتى ەكىباستۇزداعى جەكە كلينيكادا ەكپە الىپ، كەيىن قايتىس بولعان 40 جاستاعى ەر ادامنىڭ ولىمىنە بايلانىستى تەكسەرۋدى باستادى، - دەپ حابارلايدى aqshamnews.kz ءتىلشىسى.
بۇل تۋرالى مەديسينالىق جانە فارماسيەۆتيكالىق باقىلاۋ كوميتەتىنىڭ رەسمي سايتىندا حابارلاندى.
"دەنساۋلىق ساقتاۋ مينيسترلىگىنىڭ مەديسينالىق جانە فارماسيەۆتيكالىق باقىلاۋ كوميتەتى پاۆلودار وبلىسى بويىنشا دەپارتامەنتى تاۋەلسىز ساراپشىلاردى (تەراپيەۆت دارىگەر، انەستەزيولوگ-رەانيماتولوگ، تراۆماتولوگ) تارتا وتىرىپ، ەكىباستۇز قالاسى پوليسيا باسقارماسىنىڭ تەرگەۋ ءبولىمى قاۋلىسىنىڭ نەگىزىندە پاسيەنتتىڭ مارشرۋتى بويىنشا مەديسينالىق ۇيىمداردا تەكسەرۋلەر جۇرگىزىپ جاتىر"، - دەپ مالىمدەدى كوميتەتتەن.
تەكسەرۋ بارىسىندا زاڭبۇزۋشىلىقتار انىقتالعان جاعدايدا ماتەريالدار قۇقىقتىق باعا بەرۋ جانە پروسەستىك شەشىم قابىلداۋ ءۇشىن ەكىباستۇز قالاسى پوليسيا باسقارماسىنىڭ تەرگەۋ بولىمىنە جولداناتىن بولادى.
بۇعان دەيىن ەكىباستۇز تۇرعىنى اياعىنا سالىنعان ينەكسيادان كەيىن قايتىس بولعانى تۋرالى جازعانبىز. 40 جاستاعى ەر ادام قىركۇيەك ايىندا جەكە كلينيكانىڭ كومەگىنە جۇگىنگەن. ارادا ءبىر اپتا وتكەندە ەر ادام اياق استىنان دۇنيەدەن وزعان.