بيىل 21-23 تامىز كۇندەرى جەنيەۆادا حالىقارالىق كينولوگيا فەدەراسياسى (FCI) باس اسسامبلەياسىنىڭ وتىرىسى وتەدى. ونىڭ اياسىندا ۇيىمداستىرىلاتىن «World Dog Show-2023» يتتەر كورمەسىنە قازاقستاننان ەكى تازى قاتىسادى، دەپ حابارلايدى قازاقپارات.
قازاقستان كينولوگتارى وداعىنان ءمالىم ەتكەندەي، قازاقى تازىلار مۇنداي دۇنيەجۇزىلىك چەمپيوناتقا تاريحتا تۇڭعىش رەت قاتىسقالى وتىر. وعان ەلىمىزدىڭ ءتولتۋما يت تۇقىمدارىن حالىقارالىق ارەناعا تانىتۋ جۇمىستارىن بەلسەندى جۇرگىزىپ كەلە جاتقان قازاقستان كينولوگتارى وداعى مۇرىندىق بولعان.
شۆەيساريا ۇلتتىق كينولوگيالىق قوعامى قازاقستان كينولوگتارى وداعىنىڭ ءوتىنىشىن قاراستىرا كەلىپ، تازىنى جەنيەۆادا وتەتىن الەم چەمپيوناتىنا قاتىساتىن يت تۇقىمدارىنىڭ تىزىمىنە قوستى.
قازاقى تازى تاريحتا العاش رەت ەۋروپالىق وداق ەلدەرىنىڭ دۇنيەجۇزىلىك كورمەسىنە قاتىساتىن بولدى. وسى جولدا ۇلكەن جۇمىس اتقارىلدى. ءبىز بەلگياداعى FCI-مەن ارادا (حالىقارالىق كينولوگيالىق فەدەراسيا) ءبىرقاتار كەلىسسوز جۇرگىزدىك. بيىل ءساۋىر ايىندا قازاقستان كينولوگتارى وداعىنىڭ ءوتىنىشى بويىنشا، «Kazakh Tazy» تۇڭعىش رەت حالىقارالىق كينولوگيا فەدەراسياسىندا يت تۇقىمدارىنىڭ نومەنكلاتۋرالىق تىزىمىنە ەنگىزىلدى. ءبىزدىڭ ۇسىنىسىمىز FCI تاراپىنان قولداۋ تاپقانىنا وتە قۋانىشتىمىز، – دەيدى قازاقستان كينولوگتارى وداعىنىڭ پرەزيدەنتى باۋىرجان سەرىكقالي.
سونداي-اق 21-22 تامىز كۇندەرى وتەتىن حالىقارالىق كينولوگيا فەدەراسياسىنىڭ باس اسسامبلەياسىندا قازاقستاندى وسى ۇيىمنىڭ تولىق قۇقىلى مۇشەسى رەتىندە تانۋ ماسەلەسى قاراستىرىلاتىنى ايتىلىپ وتىر.
ايتا كەتەيىك، 2022 جىلى مەملەكەت باسشىسى قاسىم-جومارت توقايەۆ ءتيىستى ورگاندارعا ۇلتتىق يت تۇقىمدارى – قازاقى تازى مەن توبەتتى ساقتاۋ جانە قالپىنا كەلتىرۋ، سونداي-اق ونى ءتولتۋما قازاقى يت تۇقىمدارى رەتىندە حالىقارالىق دەڭگەيدە تانىتۋدى تاپسىرعان بولاتىن. بۇل ماسەلەنى ق ر پرەزيدەنتى ءىس باسقارماسى ءوز قاراۋىنا الىپ، جۇيەلى شەشىم قابىلداۋ ءۇشىن مەملەكەتتىك ورگاندار جۇمىسىن ۇيلەستىرۋمەن اينالىستى. پرەزيدەنت تاپسىرماسى بويىنشا ءتيىستى جۇمىس توبى قۇرىلىپ، ەكولوگيا جانە تابيعي رەسۋرستار مينيسترلىگى وكىلەتتى ورگان رەتىندە ايقىندالدى.
قازاقى تازى مەن توبەت تۇقىمدارىن حالىقارالىق ارەنادا تانىتۋ ءۇشىن شتاب-پاتەرى بەلگيادا ورنالاسقان حالىقارالىق كينولوگيا فەدەراسياسىنا ءوتىنىش جىبەرىلدى. باستى تالاپ – ەلىمىزدىڭ كينولوگيا قاۋىمداستىعىن وسى ۇيىمنىڭ تولىق قۇقىلى مۇشەسى رەتىندە تىركەۋ. ەلىمىزدىڭ اتىنان FCI-مەن ارادا قازاقستان كينولوگتارى وداعى قارىم-قاتىناس جۇرگىزەدى.