بيىل مامىر ايىندا «ماياك» جانە «المەرەك» شاعىن اۋداندارىندا 54،1 شاقىرىم سۋمەن قامتۋ جانە سۋ بۇرۋ جەلىلەرىنىڭ قۇرىلىسى باستالدى.
ينجەنەرلىك جەلىلەردى توسەۋ جۇمىستارى وسى جىلدىڭ سوڭىنا دەيىن اياقتالىپ، 1500-دەن استام ابونەنت اۋىز سۋمەن قامتىلاتىن بولادى، دەپ حابارلايدى Almaty-akshamy.kz.
جۇمىستار اياقتالعاننان كەيىن، 2024 جىلى اسفالت توسەۋ جۇمىستارىنا كىرىسپەك. بۇل تۋرالى بۇگىن الماتى قالاسىنىڭ اكىمى ەربولات دوسايەۆتىڭ تۇركسىب اۋدانى تۇرعىندارىمەن كەزدەسۋىندە ءمالىم بولدى.
3 ۋچاسكە بويىنشا – «قايرات» شاعىن اۋدانىندا ساراپتاما وسى جىلدىڭ شىلدە ايىنىڭ سوڭىندا اياقتالماق. ال رىسقۇلوۆ - جانسۇگىروۆ – شولوحوۆ – سەيفۋللين كوشەلەرىنىڭ اۋماعى بويىنشا ساراپتامالىق جۇمىستار 2024 جىلدىڭ ناۋرىز ايىندا اياقتالادى. توقاي – نوريلسكيي – پوددۋبنىي – ديكسون كوشەلەرىنىڭ بولىگىندە ساراپتاما 2023 جىلدىڭ جەلتوقسان ايىنىڭ سوڭىندا اياقتالادى.
2021 جىلى «نۇرشاشقان» شاعىن اۋدانىندا جالپى ۇزىندىعى 47،4 شاقىرىم سۋمەن قامتۋ جانە كاناليزاسيا جەلىلەرىنىڭ قۇرىلىسى اياقتالدى. بۇل جۇمىستى مەردىگەر «كومپانيا نۋرايستروي» جاۋاپكەرشىلىگى شەكتەۋلى سەرىكتەستىگى جۇرگىزگەن. الايدا، وبەكت پايدالانۋعا بەرىلگەن ساتتەن باستاپ بۇل جەلىلەردە
30-عا جۋىق اۆاريا ورىن الدى. سونىڭ سالدارىنان اۋىز سۋ بەرۋ ۇزاق ۋاقىتقا توقتاتىلۋدا. سوندىقتان تۇرعىن ءۇي ءماسسيۆىنىڭ تۇرعىندارى تاراپىنان شاعىمدار تۇسۋدە. وسىعان بايلانىستى، ەنەرگەتيكا جانە سۋمەن جابدىقتاۋ باسقارماسىنىڭ تالاپ-ارىزى بويىنشا مەردىگەرگە قاتىستى ءىستى سوتتا قاراۋ باستالدى.
بۇگىنگى تاڭدا تۇركسىب اۋدانىنىڭ اكىمدىگى توتەنشە جاعداي اياسىندا جەلىلەردىڭ جۇمىس قابىلەتتىلىگىن قالپىنا كەلتىرۋ ماسەلەسىن پىسىقتاۋدا.