ەكى مىڭنان استام قازاقستاندىق اكىم بولۋعا نيەتتى

25 شىلدەدە قازاقستان بويىنشا 730 ەلدى مەكەننىڭ اكىمى تىكەلەي سايلاۋ ارقىلى انىقتالادى.

اۋداندىق ماڭىزى بار قالالار مەن اۋىلداردىڭ اكىمدەرىن سايلاۋعا 2297 ۇمىتكەر تىركەلدى. بۇل تۋرالى قازاقستان رەسپۋبليكاسى پرەزيدەنتىنىڭ كومەكشىسى ەرلان قارين جازدى، دەپ حابارلايدى Almaty-akshamy.kz. 

«14 شىلدەدە اۋداندىق ماڭىزى بار قالالاردىڭ، اۋىلداردىڭ، كەنتتەردىڭ جانە اۋىلدىق وكرۋگتەردىڭ اكىمدىگىنە كانديداتتاردى تىركەۋ اياقتالدى. رەسپۋبليكا بويىنشا سايلاۋعا قاتىسۋ ءۇشىن جالپى 2582 ادام ءوز كانديداتۋراسىن ۇسىندى، ونىڭ 2297ء-سى نەمەسە 88،9% قاجەتتى تىركەۋدەن ءوتتى. ساياسي پارتيا كانديداتتارى – 878 ادام (38،2%)»، - دەپ جازدى ەرلان قارين Telegram جەلىسىندەگى پاراقشاسىندا. 

پرەزيدەنت كومەكشىسى ەلىمىزدىڭ بارلىق 6 ساياسي پارتياسى اۋىل اكىمدىگىنە ءوز كانديداتتارىن ۇسىنعانىن اتاپ ءوتتى. 

سونداي-اق، ۇمىتكەرلەردىڭ كوپشىلىگى، تىركەلگەندەردىڭ 1419-ى نەمەسە 61،8%-ى – ءوزىن-وزى ۇسىنعاندار. 

«ياعني، جاڭا نورمالار بەلسەندى ازاماتتار ءۇشىن ءوز الەۋەتىن ىسكە اسىرۋعا قوسىمشا مۇمكىندىك بەردى. مۇنىڭ ءبارى پرەزيدەنتتىك ساياسي رەفورمالاردىڭ قوعامدا ۇلكەن قىزىعۋشىلىق تۋدىرعانىن كورسەتەدى»، - دەيدى ەرلان قارين.