ەكى اۋىلدا اكىم سايلاۋى ءوتىپ جاتىر

قىزىلوردا وبلىسىندا بۇگىن ەكى اۋىلدىق وكرۋگتە اكىم سايلاۋى ءوتىپ جاتىر، دەپ حابارلايدى Almaty-akshamy.kz.

قازاقپارات تاراتقان مالىمەتكە سايكەس، ساياسي ماڭىزدى شارا ق ر سايلاۋ تۋرالى كونستيتۋسيالىق زاڭىنا سايكەس جۇرگىزىلۋدە. قىزىلوردا وبلىسىنىڭ ارال اۋدانىندا جاڭاقۇرىلىس جانە قۇلاندى اۋىلدىق وكرۋگتەرىنىڭ تۇرعىندارى تاڭعى ساعات 7.00-دەن باستاپ №22 جانە №29 ۋچاسكەلەرىندە تاڭداۋ جاساۋعا كەلدى. ولاردىڭ اراسىندا العاشقى كەلگەن سايلاۋشىلارعا سىيلىقتار بەرىلدى.

جاڭاقۇرىلىس اۋىلدىق وكرۋگىنىڭ اكىمىنە 4 ازامات ۇمىتكەر رەتىندە تىركەلگەن. ولاردىڭ بارلىعى - ءوزىن-وزى ۇسىنۋ تارتىبىمەن ۇمىتكەرلەر. وكرۋگتە بارلىعى 408 سايلاۋشى تىركەلگەن.

ال، قۇلاندى اۋىلدىق وكرۋگىندەگى 267 سايلاۋشى اكىم سايلاۋىندا 3 ۇمىتكەردىڭ اراسىنان لايىقتىسىن تاڭداۋعا نيەت ءبىلدىرىپ وتىر. ولاردىڭ ءبارى ءوزىن-وزى ۇسىنۋ جولىمەن كانديدات رەتىندە تىركلەگەن.

«جىل باسىنان بەرى قىزىلوردا وبلىسىندا 8 اۋىل اكىمى سايلاندى. اتاپ ايتقاندا، قازالى اۋدانىنىڭ اقجونا، ارىقبالىق، جالاعاش اۋدانىنىڭ جاڭاداريا، اققۇم، مىرزاباي احۋن، سىرداريا اۋدانىنىڭ اقجارما، جاڭاقورعان اۋدانىنىڭ جاڭارىق جانە قارماقشى اۋدانىنىڭ اقتوبە اۋىلدىق وكرۋگى بار. ەندى 25 ماۋسىمدا جاڭاقورعان اۋدانىنىڭ ءسۇتتىقۇدىق پەن قاراتوبە اۋىلىنىڭ اكىمدەرى سايلانادى. بيىل پرەزيدەنت تاپسىرماسىنا سايكەس اۋدان اكىمدەرىنىڭ سايلاۋى وتەدى. قىزىلوردا وبلىسىندا تۇرعىندار 2 اۋدان اكىمىن تىكەلەي سايلاي الادى»، - دەپ ءمالىم ەتتى وبلىستىق سايلاۋ كوميسسياسىنان.