قۇندى جادىگەرلەر

قازاقستان رەسپۋبليكاسى پرەزيدەنتىنىڭ ارحيۆىندە مەملەكەتتىك رامىزدەردىڭ دايىندالۋ تاريحىنا قاتىستى بىرەگەي ارحيۆتىك قۇجاتتار ساقتالعان. 90 جىلداردىڭ باسىندا-اق ەلدىكتىڭ تىرەگى مەملەكەتتىك رامىزدەر تۋرالى جوبالارمەن جانتالاسىپ اينالىسقان يدەيالوگيالىق بەلسەندى توپ پەن بەلگىلى عالىمدارىمىزدىڭ ارەكەتتەرى بۇگىنگى بۋىن ءۇشىن ەرلىككە پارا-پار. اكادەميك ماناش قوزىبايەۆتىڭ 1990 جىلى 18 ماۋسىمدا جازعان ەلدىڭ گيمنى مەن ەلتاڭباسىن اۋىستىرۋ كەرەكتىگى تۋرالى حاتى پرەزيدەنت ءارحيۆىنىڭ قۇندى جادىگەرىنىڭ ءبىرى دەپ ەسەپتەيمىز. بۇل حاتتا ول جەكە باسقا تابىنۋ كەزىندە جازىلعان، كەڭەستىك يدەيالوگيانى كوكسەگەن رامىزدەردەن باس تارتىپ، جاس مەملەكەتتىڭ جاڭا گيمنىن جاريالاۋ ەڭ ماڭىزدى ماسەلە دەپ باستاما كوتەرەدى.
1992 جىلى مەملەكەتتىك رامىزدەردىڭ جوباسىن تاڭداۋ ءۇشىن بايقاۋ جاريالانادى. مەملەكەتتىك تۋدىڭ 453 نۇسقاسى، ەلتاڭبانىڭ 245، گيمننىڭ 51 مۋزىكالىق جانە 132 ماتىندىك نۇسقاسى ۇسىنىلعان. وندا بۇگىنگى ەلتاڭبامىزدىڭ اۆتورى ج. مالىبەكوۆ، تۋدىڭ اۆتورى ش. نيازبەكوۆ، العاشقى گيمننىڭ مۋزىكاسىنىڭ اۆتورلارى م. تولەبايەۆ، ە. برۋسيلوۆسكيي جانە ل.حاميدي جانە ۇزدىك ماتىنگە جاريالانعان بايقاۋدا اۆتورلار ۇجىمى، بەلگىلى اقىندار م. الىمبايەۆ، ق. مىرزالييەۆ، ت. مولداعالييەۆ جانە ج. دارىبايەۆا جەڭىپ شىقتى. 1992 جىلعى 4 ماۋسىمدا «مەملەكەتتىك تۋ تۋرالى»، «مەملەكەتتىك ەلتاڭبا تۋرالى» جانە «ق ر مەملەكەتتىك گيمنىنىڭ مۋزىكالىق رەداكسياسى تۋرالى» قازاقستان رەسپۋبليكاسىنىڭ زاڭدارى بەكىتىلدى. بۇل نۇسقالاردىڭ بارلىعى ق ر پرەزيدەنتى ءارحيۆىنىڭ قورىندا مەملەكەتتىك ساقتاۋدى ورنالاسقان.
تاۋەلسىز قازاقستاننىڭ تاريحىندا ەلىمىزدىڭ مەملەكەتتىك گيمنى ەكى رەت – 1992 جانە 2006 جىلدارى بەكىتىلدى. 2006 جىلى قالىڭ بۇقارانىڭ تالقىلاۋى ناتيجەسىندە ش. قالداياقوۆ پەن ج. ناجىمەدەنوۆتىڭ 1956 جىلى جازعان «مەنىڭ قازاقستانىم» ءانىنىڭ نۇسقاسى ءانۇران رەتىندە ۇسىنىلدى، ماتىنگە ق ر پرەزيدەنتى ن.ءا. نازاربايەۆ وزگەرتۋلەر ەنگىزدى.
1996 جىلعى 24 قاڭتاردا «قازاقستان رەسپۋبليكاسىنىڭ مەملەكەتتىك رامىزدەرى تۋرالى» كونستيتۋسيالىق زاڭمەن ءۇش ءرامىزدىڭ بارلىعى ءبىر زاڭ اكتىسىنە بىرىكتىرىلگەن بولاتىن. كەيىننەن 2007 جىلدىڭ 4 ماۋسىمىندا قازاقستان رەسپۋبليكاسىنىڭ مەملەكەتتىك رامىزدەرى تۋرالى №258ء-ىىى كونستيتۋسيالىق زاڭ قابىلدانىپ، الدىڭعى زاڭدار كۇشىن جويعان بولاتىن.
مۇندا مەملەكەتتىك رامىزدەردىڭ ءتۇر، سيپاتتارى مەن مارتەبەلەرى ناقتىلاپ جازىلىپ، زاڭمەن قورعالاتىنى، سونداي-اق ولاردى قولدانۋ ءتارتىبى زاڭنىڭ قوسىمشالارى ارقىلى باياندالعان.
ارحيۆ قورىندا وسى قۇندى قۇجاتتاردىڭ قاتارىندا مەملەكەتتىك رامىزدەردى قابىلداۋعا قاتىسقان بارلىق بەلسەندى ازاماتتاردىڭ ۇسىنىستارى، كاسىبي سۋرەتشىلەردىڭ ەسكيزدەرى، زاڭنامالىق اكتىلەر، ارنايى كوميسسيانىڭ شەشىمدەرى مەن ساراپتامالىق قورىتىندىلارى، قوعام جانە مەملەكەت قايراتكەرلەرىنىڭ حاتتارى دا ساقتاۋلى تۇر.