ەندى سوت ارەكەتكە قابىلەتسىز دەپ تانىعان 18 جاستان اسقان ادامداردىڭ قامقورشىلارى eGov.kz پورتالىندا ونلاين ءوتىنىش بەرە الادى، - دەپ حابارلايدى aqshamnews.kz. ۇلتتىق اقپاراتتىق تەحنولوگيالار ورتالىعىنا سىلتەمە جاساپ.
"مەملەكەتتىك قىزمەتتەر سالاسىندا "كەدەرگىسىز ورتا" قۇرۋ ازاماتتاردىڭ ءارتۇرلى ساناتتارى ءۇشىن، ونىڭ ىشىندە مۇمكىندىكتەرى شەكتەۋلى ادامدار ءۇشىن تەڭ مۇمكىندىكتى قامتاماسىز ەتەدى. بۇرىن سوت ارەكەتكە قابىلەتسىز دەپ تانىعان 18 جاستان اسقان ادامداردىڭ قامقورشىلارى قاعاز تۇرىندە قۇجاتتار جيناپ، ارنايى وتىنىمدەردى راسىمدەۋ ءۇشىن كەزەكتە تۇراتىن. جاڭارتىلعان قىزمەت ۋاقىتتى ەداۋىر ۇنەمدەپ، قاجەت قۇجاتتاردى ونلاين رەجيمدە بەرۋگە مۇمكىندىك بەرەدى"، - دەلىنگەن حابارلامادا.
ەندى قامقورشىلارعا مەملەكەت كورسەتەتىن قىزمەتتەردىڭ كەلەسى تۇرلەرىن الۋعا ونلاين وتىنىمدەردى راسىمدەۋگە بولادى:
- مۇگەدەكتەردى پروتەزدىك-ورتوپەديالىق كومەكپەن قامتاماسىز ەتۋ؛
- ءجۇرىپ-تۇرۋى قيىن ءبىرىنشى توپتاعى مۇگەدەكتەر ءۇشىن جەكە كومەكشىنىڭ كورسەتىلەتىن قىزمەتتەرىن پايدالانۋ؛
- مۇگەدەكتەردى تەحنيكالىق كومەكشى (كومپەنساتورلىق) قۇرالدارمەن قامتاماسىز ەتۋ؛
- مۇگەدەكتەردى ارنايى ءجۇرىپ-تۇرۋ قۇرالدارىمەن قامتاماسىز ەتۋ؛
- مۇگەدەكتەر مەن مۇگەدەك بالالاردى ساناتوريي-كۋرورتتىق ەمدەۋمەن قامتاماسىز ەتۋ؛
- ەستۋ قابىلەتى ناشار مۇگەدەكتەرگە ىمداۋ ءتىلى مامانىنىڭ قىزمەتىن پايدالانۋ (جىلىنا 60 ساعات)؛
- ۇيدە كۇتىم جاساۋ جاعدايىندا ارناۋلى الەۋمەتتىك قىزمەتتەر الۋ؛
- مەديسينالىق-الەۋمەتتىك مەكەمەلەردە (ۇيىمداردا) ارناۋلى الەۋمەتتىك كورسەتىلەتىن قىزمەتتەر الۋ.
كورسەتىلەتىن قىزمەتتەردى الۋ ءۇشىن نە ىستەۋ كەرەك؟
- eGov.kz پورتالىندا اۆتوريزاسيادان ءوتۋ جانە "الەۋمەتتىك قامسىزداندىرۋ" بولىمىنە ءوتۋ قاجەت؛
- بۇدان ءارى "مۇگەدەكتىگى بار ادامداردى قولداۋ" بولىمىندە ۇسىنىلعان تىزبەدەن كورسەتىلەتىن قىزمەتتى تاڭداۋ كەرەك؛
- ەسق كومەگىمەن قىزمەتكە قول قويۋ كەرەك.
كورسەتكەن ۋاقىت ىشىندە كەلىپ تۇسەتىن ءوتىنىمدى وڭدەۋ تۋرالى حابارلاممەن جەكە كابينەتتە تانىسۋعا بولادى ("قىزمەتتەردى الۋ تاريحى" بولىمىندە).