قارجى مينيسترلىگى Egov Mobile ءموبيلدى قوسىمشاسىنىڭ جاڭا نۇسقاسىن ىسكە قوستى، دەپ حابارلايدى aqshamnews.kz
بۇل – قولدانباداعى سوڭعى جىلداردا بولعان ەڭ ۇلكەن جاڭارتۋ: ينتەرفەيس قايتا جاسالدى، ناۆيگاسيا جاقساردى، اقىلدى ىزدەۋ جانە ساندىق قۇجاتتارعا جىلدام قولجەتىمدىلىك قوسىلدى.
"بەس جىل ىشىندە eGov Mobile ءموبيلدى قوسىمشاسىن پايدالانۋشىلار سانى التى ەسەگە ءوسىپ، 11 ميلليوننان استى"، - دەلىنگەن حابارلامادا.
جاڭا ىزدەۋ جانە ءاى كومەكشى
نەگىزگى جاڭالىقتاردىڭ ءبىرى – ينتەللەكتۋالدى ىزدەۋ.
"ەندى سۇراۋدى ەنگىزگەن كەزدە بارلىق ءتيىستى ناتيجەلەر كورسەتىلەدى: قىزمەتتەر، ومىرلىك جاعدايلار. ىزدەۋ جولىنىڭ جانىندا جاساندى ينتەللەكت نەگىزىندە EGOV ءاى ۆيرتۋالدى كومەكشىسى پايدا بولدى"، - دەپ اتاپ ءوتتى مينيسترلىك.
eGov AI قولدانباعا ەنگىزىلگەن جانە پايدالانۋشىلارعا مەملەكەتتىك قىزمەتتەر تۋرالى قاجەتتى اقپاراتتى جىلدام تابۋعا كومەكتەسەدى.
"ول چات فورماتىندا جۇمىس ىستەيدى – سۇراق قويساڭىز بولدى، ءاى كومەكشى قاراپايىم سوزدەرمەن نە ىستەۋ كەرەكتىگىن تۇسىندىرەدى، قاجەت بولعان جاعدايدا ونى تىكەلەي قاجەتتى بولىمگە نەمەسە قىزمەتكە باعىتتايدى"، - دەلىنگەن حابارلامادا.
جەڭىلدەتىلگەن ناۆيگاسيا
ەندى باستى بەتتە ەڭ تانىمال قىزمەتتەردىڭ بەلگىشەلەرى بار. EGov لوگوتيپى بار بەلگىشە كورنەكتى جەردە ورنالاسقان جانە بارلىق قىزمەت جيناقتالعان كاتالوگقا تىكەلەي اپارادى.
"ناۆيگاسيا ءۇشىن قىزمەتتەر ەلەكتروندى ۇكىمەت پەن ە-ليسەنزيالاۋ پورتالىنىڭ باعىتتارىنا بولىنەدى"، - دەلىنگەن حابارلامادا.
جاڭا "قىزمەتتەر"
پايدالانۋشىلارعا ىڭعايلى بولۋ ءۇشىن ساندىق قىزمەتتەردىڭ تولىق ءتىزىمى ەندى قوسىمشانىڭ تومەنگى مازىرىندەگى "قىزمەتتەر" بەلگىشەسى ارقىلى قولجەتىمدى.
"ءبولىم ينتەرفەيسى ءينتۋيتيۆتى بولا باستادى: ءار قىزمەتكە قارسى باتىرما تۇرىندەگى بەلگىشە ورنالاستىرىلدى – باسقان كەزدە قىزمەت اۆتوماتتى تۇردە تانىمال تىزىمگە قوسىلادى"، - دەيدى ۆەدومستۆو.
بەتتە نەگىزگى مۇمكىندىكتەردىڭ قىسقاشا سيپاتتامالارى كورسەتىلگەن باننەرلەر بار، بۇل قولدانبانىڭ مۇمكىندىكتەرىن جىلدام شارلاۋعا كومەكتەسەدى.
ساندىق قۇجاتتارعا قول جەتكىزۋ
جەكە كۋالىك، ءتولقۇجات، تۋۋ تۋرالى كۋالىك جانە باسقا دا ماڭىزدى قۇجاتتار ەندى تىكەلەي باستى بەتتە كورسەتىلەدى – بولەك بولىمگە ءوتۋدىڭ قاجەتى جوق.
"بۇل ونىڭ ءتۇپنۇسقالىعىن تەكسەرۋ ءۇشىن قاجەتتى قۇجاتتى نەمەسە QR كودىن بىردەن كورسەتۋگە مۇمكىندىك بەرەدى"، - دەلىنگەن حابارلامادا.
ومىرلىك جاعدايلار كاتالوگى
بۇل سىزگە قادامدىق نۇسقاۋلار الۋعا مۇمكىندىك بەرەدى. مىسالى، ەمحاناعا قالاي تىركەلۋ، قۇجاتتاردى قالپىنا كەلتىرۋ نەمەسە جۇرگىزۋشى كۋالىگىن الۋ.
"قاجەتتى جاعدايدى تاڭداعاندا قۇرىلىمدىق اقپارات اشىلادى: نە ىستەۋ كەرەك، قايدا جۇگىنۋ كەرەك، قانداي قىزمەتتى پايدالانۋ كەرەك جانە ءار جاعدايدا قانداي نورماتيۆتىك قۇجاتتار قولدانىلادى"، - دەلىنگەن حابارلامادا.
ءاربىر ومىرلىك جاعداي ينتەراكتيۆتى ساۋالنامامەن بىرگە جۇرەدى. ونىڭ نەگىزىندە پايدالانۋشى جەكە سەنارييدى الادى. ەگەر ۇسىنىلعان شەشىم سايكەس كەلمەسە، ءسىز ساۋالنامانى قايتالاي الاسىز – جۇيە بالاما نۇسقانى ۇسىنادى.
eGov QR، حابارلامالار جانە جەكە پروفيل
ەندى ەكراندا QR قىزمەتىنىڭ ماقساتى تۋرالى تۇسىنىكتەمە كورسەتىلەدى، قاجەت بولعان جاعدايدا ەكران قاراڭعى ۋاقىتتا ىڭعايلى پايدالانۋ ءۇشىن اۆتوماتتى تۇردە جارىقتاندىرىلادى.
حابارلامالار بولىمىندە قىزمەت كۇيى، ساۋالناما ناتيجەلەرى جانە ماڭىزدى جاڭارتۋلار تۋرالى اقپاراتتار ەندى تاقىرىپتار بويىنشا توپتاستىرىلعان.
"جەكە پروفيل" ەندى جەكە دەرەكتەردى، وتباسى، دەنساۋلىق، ەڭبەك قىزمەتى، ايىپپۇلدار، مۇلىك جانە باسقا سالالار تۋرالى مالىمەتتەردى كورسەتەدى. بەرىلگەن كەلىسىمدەردىڭ تاريحى دا قولجەتىمدى جانە قاجەتتى بولىمگە ءوتۋ تۇسىنىكتى جانە لوگيكالىق ناۆيگاسيا ارقىلى جۇزەگە اسىرىلادى.