وسى جىلدار ىشىندە قازاقستاندىقتار قانشا قىزمەت الدى؟
«ۇلتتىق اقپاراتتىق تەحنولوگيالار» اق باسقارما ءتوراعاسى روستيسلاۆ كونياشكيننىڭ ايتۋىنشا، وسى 17 جىلدىڭ ىشىندە پورتالعا 14 ملن قولدانۋشى تىركەلىپ، 400 ميلليوننان استام قىزمەت العان، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ەلەكتروندى ۇكىمەت پورتالى وسىدان تۋرا 17 جىل بۇرىن ىسكە قوسىلعان ەدى. بۇگىنگى تاڭدا 14 ادام ونىڭ قولدانۋشىسى بولىپ وتىر. بۇل پورتال ازاماتتار مەن مەملەكەتتىڭ، بيزنەس پەن مەملەكەتتىڭ اراسىنداعى ءوزارا ارەكەتتىڭ نەگىزگى قۇرالىنا اينالدى. مەملەكەت كورسەتەتىن قىزمەتتەردى جەڭىلدەتىپ قانا قويماي، جەمقورلىق تاۋەكەلدەرىن تومەندەتىپ وتىر. ازاماتتاردىڭ ءومىرىن قولايلى ەتە ءتۇستى»، - دەدى روستيسلاۆ كونياشكين.
سونداي-اق، ول ەلەكتروندى ۇكىمەت جوباسىن جەتىلدىرۋ جۇمىستارى قازاقستاندى بۇۇ-نىڭ سيفرلىق رەيتينگتەرىندەگى ورنىن نىعايتقانىن ايتتى.
«ەلەكتروندى ۇكىمەت جوباسى بويىنشا الەمدەگى كوشباسشى ەلدەردىڭ قاتارىنا كىرىپ وتىرمىز. ونلاين قىزمەتتەر كورسەتۋ جونىنەن العاشقى وندىققا كىرەمىز. وسى جىلدىڭ اياعىنا دەيىن ەلەكتروندى نەگىزدە سمارتفون ارقىلى كورسەتىلەتىن مەملەكەت قىزمەتتەرىنىڭ ۇلەسىن 90%-عا جەتكىزۋ مىندەتى تۇر. ءموبيلدى قوسىمشانى ءقازىردىڭ وزىندە 3 ميلليونداي ادام قولدانىپ ءجۇر. بۇلاردىڭ ءبارى اي سايىن ونىڭ قىزمەتىنە جۇگىنەتىن بەلسەندى قولدانۋشىلار»، - دەدى «ۇلتتىق اقپاراتتىق تەحنولوگيالار» اق باسقارما ءتوراعاسى.