ەلىمىزدە بۇيرەك ساتۋدى زاڭداستىرۋ ۇسىنىلدى

ءقازىر ورگان ترانسپلانتاسياسىنا مۇقتاج 3 805 پاسيەنت بار.

ءماجىلىس دەپۋتاتى گۇلدارا نۇرىموۆا مەملەكەتتەن دونورلارعا تولەم تولەۋدى ۇسىندى، دەپ حابارلايدى Almaty-akshamy.kz

ول ەرىكتى تۇردە اقشالاي وتەماقىعا تۋىس ەمەس دونورلاردىڭ بۇيرەگىن الۋعا رۇقسات ەتۋدى ۇسىندى.

دەپۋتاتتىڭ ايتۋىنشا، قازىرگى تاڭدا ورگان ترانسپلانتاسياسىنا مۇقتاج 3 805 پاسيەنت، سونىڭ ىشىندە 90 بالا كۇتۋ پاراعىندا تۇر. ناۋقاستاردىڭ 91%ء-ى – بۇيرەك اۋىستىرۋ كەزەگىندە. وكىنىشكە قاراي، بىلتىر 320 ادام قايتىس بولۋىنا بايلانىستى "كۇتۋ پاراعىنان" شىعىپ قالعان.

"زاڭنامادا قايتىس بولعان ادامداردىڭ ورگاندارىن الۋعا كەلىسىم پرەزۋمپسياسى ناقتى ايقىندالماعاندىقتان، مايىتتىك دونورلىق ءقازىر دامىماي جاتىر. تەك تۋىسقان دونورلاردىڭ ورگاندارى الىنادى. بۇل سالانىڭ توقىراۋىنىڭ نەگىزگى سەبەبى – قايتىس بولعان جانە تۋىس ەمەس دونورلاردىڭ ورگاندارىنىڭ جەتىسپەۋشىلىگى"، - دەيدى نۇرىموۆا ۆيسە-پرەمەر التاي كولگىنوۆكە جولداعان دەپۋتاتتىق ساۋالىندا.

ول دونورلىققا جانە ورگان ترانسپلانتاسياسىنا مەملەكەتتىك دەڭگەيدە قولداۋ كورسەتىلۋى قاجەت دەپ سانايدى.

"قازاقستان حالقىنا" قورى جۇمىسىن باستاعان ساتتەن باستاپ وعان شەتەلدە ورگان اۋىستىرۋ وپەراسياسىنا كومەك كورسەتۋ بويىنشا 261 ءوتىنىم تۇسكەن. تۋىس ەمەس دونورلاردىڭ ورگانىن الۋ ءۇشىن قازاقستاندىقتار شەتەلدىك كلينيكالارعا بارۋعا ءماجبۇر. مىسالى، بەلارۋستە جۇرەك اۋىستىرۋ قۇنى 150 مىڭ دوللار، باۋىر 140 مىڭ دوللار، ال بۇيرەك 50 مىڭ دوللار تۇرادى.

"يران مەن پاكىستاندا بۇيرەك ساتۋ زاڭدى جانە رەتتەلگەن، ورتاشا باعاسى 5-6 مىڭ دوللار. ورگان ساتۋ تۋرالى بەيرەسمي حابارلامالاردى قازاقستاندا دا كەزدەستىرۋگە بولادى. وندا نەگە شەت ەلدەردىڭ بۇيرەك ساتۋ مەن ساتىپ الۋ تاجىريبەسىن زەرتتەپ، بۇل پروسەستى بىزدە دە رەتتەمەسكە؟"، - دەيدى نۇرىموۆا.

دەپۋتاتتىڭ ايتۋىنشا، قولدانىستاعى زاڭ دونور تاڭداعاندا گەنەتيكالىق، جاقىن تۋىسقاندىق بايلانىستىڭ بولعانىن كوزدەيدى. الايدا كوپ جاعدايدا تۋىستار سايكەس كەلە بەرمەيدى.

"بوتەن ادام ورگانىن بەرۋگە دايىن، ءبىراق بۇعان زاڭ رۇقسات ەتپەيدى. وسىعان بايلانىستى ماتەريالدىق وتەماقىعا ەرىكتى نەگىزدە تۋىس ەمەس دونورلاردىڭ جانە قايتىس بولعان دونورلاردىڭ بۇيرەگىن بەرۋگە رۇقسات ەتۋ مۇمكىندىگىن قاراستىرۋ قاجەت دەپ سانايمىز"، - دەدى نۇرىموۆا.